వరంగల్‌లో బీరన్న బోనాలు: మంత్రి కొండా సురేఖ హాజరు

వరంగల్ జిల్లా కరీమాబాద్‌లో బీరన్న బోనాల ఉత్సవానికి దేవాదాయ శాఖ మంత్రి కొండా సురేఖ ముఖ్య అతిథిగా హాజరయ్యారు. ఈ సందర్భంగా ఆమె తలపై బోనాన్ని పెట్టుకొని బీరన్న స్వామికి నైవేద్యాన్ని సమర్పించారు.

ఈ బోనాల ఉత్సవాలకు ముందు కరీమాబాద్ బొడ్రాయి వద్ద గ్రామ క్రతువు నిర్వహించారు. ఈ కార్యక్రమంలో పెద్ద సంఖ్యలో భక్తులు పాల్గొన్నారు. పోతరాజుల విన్యాసాలు వేడుకలకు ప్రత్యేక ఆకర్షణగా నిలిచాయి.

ప్రతి సంవత్సరం తొలి ఏకాదశి పర్వదినం రోజున కురుమ కులస్తులు బీరన్న స్వామికి బోనాలు సమర్పించడం ఆనవాయితీగా వస్తోంది. ఈ పండుగ ద్వారా రాష్ట్రంలో సమృద్ధిగా వర్షాలు కురవాలని, ప్రజలు ఆరోగ్యంగా ఉండాలని భక్తులు ప్రార్థిస్తారు. మొక్కుబడులు చెల్లించుకునేందుకు చాలా మంది మహిళలు పసుపు కుంకుమలతో అలంకరించుకొని బోనాలు ఎత్తుకొని వస్తారు.

మంత్రి కొండా సురేఖ మాట్లాడుతూ, రాష్ట్రంలోని అన్ని ఆలయాల్లో వర్షాల కోసం ప్రత్యేక పూజలు జరుగుతున్నాయని తెలిపారు.