నెల్లూరు జిల్లా కోవూరులో పారిశుద్ధ్య సమస్యలు; స్థానికుల ఫిర్యాదులు

నెల్లూరు జిల్లా కోవూరు పట్టణంలో పారిశుద్ధ్యం లేక స్థానికులు తీవ్ర ఇబ్బందులు పడుతున్నారు. చెత్త సేకరణ, డ్రైనేజీ మురుగునీటి నిర్వహణ లేకపోవడంతో ఆరోగ్య సమస్యలు పెరిగాయని వారు చెబుతున్నారు.

స్థానికుల ప్రకారం, కొన్ని ప్రాంతాల్లో మురుగు కాలువలు చెత్తతో నిండిపోయి దుర్గంధం వస్తోంది. రోడ్లపై డ్రైనేజీ నీళ్లు నిలిచిపోతున్నాయి. దీనివల్ల దోమలు విపరీతంగా పెరిగి, పిల్లలు, పెద్దల్లో డెంగ్యూ వంటి జ్వరాలు వస్తున్నాయని స్థానికులు ఫిర్యాదు చేశారు.

కాలువల నిర్వహణ లేకపోవడంతో పాములు, తేళ్లు వంటి ప్రమాదకర జంతువులు కూడా కనిపిస్తున్నాయని స్థానికులు ఆవేదన వ్యక్తం చేశారు. పక్కనే ఉన్న పడుగుపాడు మేజర్ పంచాయతీలోనూ ఇదే పరిస్థితి ఉంది.

పంచాయతీ అధికారులకు పలుమార్లు ఫిర్యాదు చేసినా స్పందన లేదని స్థానికులు చెప్పారు. సమస్య పరిష్కారానికి ప్రజా ప్రతినిధులు జోక్యం చేసుకోవాలని వారు కోరుతున్నారు.