కృష్ణా జిల్లా పామర్రు నియోజకవర్గంలో మట్టి మాఫియా అక్రమ తవ్వకాలు

కృష్ణా జిల్లా పామర్రు నియోజకవర్గంలో చెరువుల నుంచి మట్టి అక్రమ తవ్వకాలు పెద్దఎత్తున జరుగుతున్నాయి. నియోజకవర్గంలోని నాలుగు మండలాల పరిధిలో ఉన్న చెరువుల్లో రాత్రిపగలు తేడా లేకుండా తవ్వకాలు కొనసాగుతున్నాయి.

రిమ్మనపుడి, తోట్లవల్లూరు, పసుమర్రు, మంటాడ, పెద్దపారిపూడి ప్రాంతాల్లో ఈ అక్రమ తవ్వకాలు జరుగుతున్నాయి. ఒక ట్రాక్టర్ మట్టికి 1,000 నుంచి 2,000 రూపాయలు వసూలు చేస్తున్నారు. వందల కొద్దీ ట్రాక్టర్లతో మట్టిని స్థానిక వెంచర్లకు తరలిస్తున్నారు. గత ఏడాది ఈ తవ్వకాల ద్వారా కోటి రూపాయలకు పైగా సంపాదించారని ఆరోపణలు వినిపిస్తున్నాయి.

రెమ్మనిపూడి శివారు దేవానందపురం చెరువులో ఒక్క రెండు రోజుల్లోనే సుమారు 1 ఎకరా 70 సెంట్ల విస్తీర్ణంలో మట్టిని తవ్వేశారు. ప్రొక్లైనర్ సహాయంతో ఈ తవ్వకాలు జరిగాయి.

చెరువుల్లో మట్టి తవ్వాలంటే గ్రామ పంచాయతీ తీర్మానం తప్పనిసరి. గ్రామ అభివృద్ధి పనులకు మాత్రమే పరిమిత అనుమతి ఉంటుంది. అయితే ఈ నిబంధనలను అతిక్రమించి మట్టిని గ్రామం బయటకు తరలిస్తున్నారని ఆరోపణలు ఉన్నాయి.

ఈఓ PIRD జనార్దనరావు, MPDO జ్యోతి అధికారులు తవ్వకాల ప్రాంతాన్ని సందర్శించారు. పంచాయతీ తీర్మానం ఉన్నప్పటికీ మట్టిని గ్రామం బయటకు తరలించడం సహించబోమని జనార్దనరావు హెచ్చరించారు. అయితే అధికారులు వెళ్ళిన రోజు మాత్రమే తవ్వకాలు ఆగి, మళ్ళీ మరుసటి రోజు కొనసాగుతున్నాయని స్థానికుల ఆరోపణ.

పామర్రు నియోజకవర్గంలో ఈ మట్టి మాఫియాను గణేష్, ప్రవీణ్ అనే ఇద్దరు వ్యక్తులు నడిపిస్తున్నారని సమాచారం. స్థానిక MLA వర్ల కుమార్ రాజ అనుచరులు ఈ తవ్వకాలకు అండగా ఉన్నారని ఆరోపణలు వస్తున్నాయి. ఈ విషయంపై MLA వర్ల కుమార్ రాజ స్పందన తెలియాల్సి ఉంది. అక్రమ తవ్వకాలపై ఫిర్యాదు చేసిన వారిని బెదిరిస్తున్నారని స్థానికులు చెప్తున్నారు.