భారీ వర్షాలతో కృష్ణా, గోదావరి నదుల్లో వరద ఉధృతి; శ్రీశైలం, పోలవరం ప్రాంతాల్లో అప్రమత్తత

ఎగువ ప్రాంతాల్లో కురుస్తున్న భారీ వర్షాల కారణంగా కృష్ణా, గోదావరి నదుల్లో వరద ప్రవాహం ఉధృతంగా మారింది. జూరాల ప్రాజెక్టు నుంచి శ్రీశైలం వైపు కృష్ణమ్మ వేగంగా ప్రవహిస్తోంది. పోలవరం పరిసర ప్రాంతాల్లో శబరి, గోదావరి నదులు పొంగి ప్రవహిస్తుండటంతో అధికారులు అప్రమత్తమయ్యారు.

కర్ణాటకలోని ఆల్మట్టి డ్యామ్‌కు 82,000 క్యూసెక్కుల వరద నీరు వస్తుండగా 1.1 లక్షల క్యూసెక్కులు దిగువకు విడుదల చేస్తున్నారు. నారాయణపూర్ డ్యామ్ నుంచి 1.11 లక్షల క్యూసెక్కులు, మహారాష్ట్రలోని ఉజ్జైనీ జలాశయం నుంచి 32,000 క్యూసెక్కులు విడుదలవుతున్నాయి. దీంతో తెలంగాణలోని జూరాల ప్రాజెక్ట్‌కు వరద ప్రవాహం పెరిగి 17 గేట్లు ఎత్తి దాదాపు లక్ష క్యూసెక్కుల నీటిని దిగువకు విడుదల చేస్తున్నారు. శ్రీశైలం జలాశయానికి ఇన్‌ఫ్లో లక్ష క్యూసెక్కులుగా ఉండగా నీటి నిల్వలు క్రమంగా పెరుగుతున్నాయి. ప్రాజెక్ట్ పూర్తి స్థాయి నీటిమట్టం 885 అడుగులు. నాగార్జున సాగర్‌లో ప్రస్తుతం 136.99 టీఎంసీల నీరు నిల్వ ఉంది.

గోదావరి పరివాహకంలో మహారాష్ట్రలో కురుస్తున్న వర్షాలతో జైక్వాడి ప్రాజెక్టుకు 34,000 క్యూసెక్కుల ఇన్‌ఫ్లో వస్తోంది. సంగారెడ్డి జిల్లా సింగూరు, నిజాంసాగర్ ప్రాజెక్టులకు పెద్దగా వరద రాలేదు. కానీ కొమరంభీం ఆసిఫాబాద్ జిల్లాలో ప్రాణహిత నది పొంగి పుష్కర ఘాట్ మెట్లు మునిగాయి. ములుగు జిల్లాలో సమ్మక్క సాగర్ నుంచి భారీగా నీటిని విడుదల చేయడంతో గోదావరి నీటిమట్టం వేగంగా పెరిగి మొదటి ప్రమాద హెచ్చరిక స్థాయికి చేరువైంది. నదీ తీర ప్రజలు అప్రమత్తంగా ఉండాలని అధికారులు సూచించారు.

పోలవరం జిల్లాలో శబరి, గోదావరి నదుల వరద ఉధృతం కొనసాగుతోంది. కూనవరం వద్ద శబరీ-గోదావరి సంగమం వద్ద ఒక్క రోజులో నీటిమట్టం 10 అడుగులు పెరిగి ప్రస్తుతం 30 అడుగుల లోతున నీరు ప్రవహిస్తోంది. జిల్లా కలెక్టర్ దినేష్ కుమార్ ఆదేశాలతో కంట్రోల్ రూమ్స్ ఏర్పాటు చేశారు. 16 గ్రామాలను ముంపు గ్రామాలుగా గుర్తించి సహాయక చర్యలు చేపట్టారు. కోనవరం శబరి బ్రిడ్జ్ వద్ద అత్యవసర పరిస్థితుల కోసం లాంచీలు సిద్ధంగా ఉంచారు.