ప్రాంతీయవాదం ఉగ్రవాదం కంటే ప్రమాదం అన్న పవన్ వ్యాఖ్యలపై కేటీఆర్ కౌంటర్

AP ఉప ముఖ్యమంత్రి పవన్ కళ్యాణ్ ఇటీవల చేసిన వ్యాఖ్యలపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర స్థాయిలో స్పందించారు. ప్రాంతీయవాదం ఉగ్రవాదం కంటే ప్రమాదకరమని పవన్ కళ్యాణ్ చెప్పారని కేటీఆర్ గుర్తు చేశారు.

కేటీఆర్ మాట్లాడుతూ, తెలంగాణ ఏర్పాటు కోసం వేలాది మంది ప్రాణత్యాగాలు చేశారని, ఈ నేల రక్తంతో తడిసిందని చెప్పారు. ప్రాంతీయవాదం అనేది ఉగ్రవాదం కాదని, పొట్టి శ్రీరాములు వంటి వారు రాష్ట్ర సాధన కోసం ఆమరణ నిరాహర దీక్ష చేశారని ఉదాహరించారు. ఏ రాష్ట్రంలోనైనా ఎవరైనా పార్టీ పెట్టి పోటీ చేయవచ్చు, కానీ ఆ ప్రాంతం పట్ల అవగాహన, గౌరవం ఉండాలని కేటీఆర్ సూచించారు. జనసేన 2023లో తెలంగాణలో పోటీ చేసిందని, అప్పుడు ఎవరూ అడ్డుకోలేదని చెప్పారు.

ప్రధాని మోడీ గుజరాత్‌కు పరిశ్రమలు తరలించడం ఆర్థిక ప్రాంతీయవాదమా అని ప్రశ్నించారు. తెలంగాణకు కేటాయించాల్సిన కేన్స్, మైక్రాన్ పరిశ్రమలు గుజరాత్‌కు తీసుకెళ్లారని ఆరోపించారు. పవన్ కళ్యాణ్ తెలంగాణపై చేసిన వ్యాఖ్యలను తీవ్రంగా తప్పుపట్టారు.

తెలంగాణ త్యాగాల నేల, ఇక్కడి ప్రజలు జాతీయ భావంతో ఉన్నారని, నైతిక ఉపన్యాసాలు అవసరం లేదని కేటీఆర్ అన్నారు. పవన్ కళ్యాణ్ ను AP ఉప ముఖ్యమంత్రిగా గౌరవిస్తామని, కానీ రాజకీయాల్లో తలదూర్చవద్దని సూచించారు. తెలంగాణ తన సమస్యలు తానే పరిష్కరించుకోగలదని, పవన్ కళ్యాణ్ కు ఇక్కడ విలువ లేదన్నట్టుగా మాట్లాడారు.