ధాన్యం కొనుగోళ్లపై కేటీఆర్ సీఎంకు లేఖ — మంత్రి ఉత్తం కౌంటర్

BRS నేత కేటీఆర్ తెలంగాణ ముఖ్యమంత్రి రేవంత్ రెడ్డికి లేఖ రాశారు. రాష్ట్రంలో ధాన్యం కొనుగోళ్లు సరిగా జరగడం లేదని ఆరోపించారు.

రైతులు ఆత్మహత్యలకు పాల్పడుతున్నారని, కొనుగోలు కేంద్రాలు సక్రమంగా పనిచేయడం లేదని కేటీఆర్ పేర్కొన్నారు. ధాన్యం తగలబెట్టుకున్న సంఘటనలు జరుగుతున్నా ప్రభుత్వం స్పందించడం లేదని ఆరోపించారు. గన్ని బ్యాగులు కూడా ప్రభుత్వం అందించడం లేదని రైతులే కొనుక్కుంటున్నారని అన్నారు.

ఈ ఆరోపణలపై మంత్రి ఉత్తం కుమార్ రెడ్డి స్పందించారు. BRS తప్పుడు ప్రచారం చేస్తోందని పేర్కొన్నారు. 8,575 కొనుగోలు కేంద్రాల ద్వారా ఇప్పటివరకు 46.21 లక్షల మెట్రిక్ టన్నుల ధాన్యం కొనుగోలు చేశామని వివరించారు. 63,000 మంది రైతులకు ₹7,841 కోట్లు చెల్లించామని తెలిపారు. ధాన్యం రవాణాకు 13,000 వాహనాలు వినియోగించామని చెప్పారు.

ప్రభుత్వం వద్ద 18.3 కోట్ల గన్ని బ్యాగులు అందుబాటులో ఉన్నాయని, కేటీఆర్ చేస్తున్న ఆరోపణలు వాస్తవ విరుద్ధమని ఉత్తం కుమార్ రెడ్డి పేర్కొన్నారు.