ఏజెన్సీ ప్రాంతాల్లో వరి సాగుకు సేంద్రియ యాజమాన్యంపై KVK శాస్త్రవేత్త సూచనలు

విశాఖ ఏజెన్సీ ప్రాంతాల్లోని గిరిజన రైతులు ఖరీఫ్ సీజన్ వరి సాగు ప్రారంభించారు. పెట్టుబడులు పెట్టినా సరైన దిగుబడులు రావడం లేదని రైతులు ఆందోళన వ్యక్తం చేస్తున్నారు. ఈ నేపథ్యంలో అనకాపల్లి జిల్లా హరిపురం BCT KVK కు చెందిన శాస్త్రవేత్త ప్రసాదరావు వారికి పలు సూచనలు చేశారు.

ఏటవాలు పొలాలు, వర్షాధార సాగు ఉన్న ఈ ప్రాంతంలో తక్కువ కాలపరిమితి ఉన్న వంగడాలను ఎంపిక చేసుకోవాలని ఆయన సూచించారు. విత్తనాలకు సూడోమోనస్ ఫ్లోరిసెన్స్ 10 గ్రాములు కేజీ విత్తనానికి కలిపి శుద్ధి చేయాలి, దీంతో తొలి దశలో తెగుళ్లు రాకుండా నివారించవచ్చు. ఆకులు పాలిపోతే ఇనుము, జింక్ లోపం సూచిస్తుంది కాబట్టి మార్కెట్లో లభించే మైక్రోన్యూట్రియెంట్ మిశ్రమం (అగ్రమన్ మ్యాక్స్, ఫార్ములా ఫైర్ వంటివి) 5 గ్రాములు లీటర్ నీటికి కలిపి వారంలో రెండు సార్లు ఎకరం నారుమడికి 16 లీటర్లు పిచికారు చేస్తే సూక్ష్మ పోషక లోపాలు తగ్గుతాయి.

రసాయన ఎరువులకు బదులు సేంద్రియ పద్ధతులు అవలంబించాలని ప్రసాదరావు తెలిపారు. ఎకరాకు రెండు నుండి మూడు ట్రాక్టర్ల పెంటపొగు, పచ్చిరొట్ట ఎరువులు (జీలుగ, జనుము, పిల్లి పెసర, అలసంద) ఉపయోగించాలి. ఘన జీవామృతం ఎకరాకు 200 కిలోలు, ద్రవ జీవామృతం ప్రతి 15-20 రోజులకు 200 లీటర్లు వాడితే పోషకాలు అందుతాయి. ఎకరాకు అజోస్పైరిల్లం, పీఎస్బీ, కేఆర్బీ లిక్విడ్ ఎరువులు అర లీటరు చొప్పున 100-150 కిలోల గంధంలో కలిపి చల్లితే రసాయన వాడకం 15-20% వరకు తగ్గించవచ్చు.

పురుగు, తెగుళ్ల నివారణకు పలు జీవసంబంధ పరిష్కారాలు సూచించారు. నారు నాటేటప్పుడు కాండం తలచు పురుగు గుడ్లను నివారించేందుకు ఆకు చివర్లు తుంచి నాటాలి. ప్రతి 15-20 ఎకరాలకు ఒక పక్షి స్థావరం ఏర్పాటు చేస్తే పురుగుల ఉదృతి తగ్గుతుంది. తెగుళ్లు రాకుండా ముందస్తుగా వేప నూనె (5 మిల్లీలీటర్లు లీటర్ నీటికి) 200 లీటర్లు ఎకరాకు పిచికారు చేయాలి. అగ్గి తెగులుకు పుల్లని మజ్జిగ, ఇంగువ ద్రావణం ఉపయోగపడుతుందని ఆయన వివరించారు.