అనంతపురం హిత ఆసుపత్రిలో 3వ అంతస్తు నుంచి పడ్డ ల్యాబ్ టెక్నీషియన్ అశోక్ మృతి

అనంతపురంలోని హిత మల్టీ స్పెషాలిటీ ఆసుపత్రిలో శుక్రవారం సాయంత్రం ల్యాబ్ టెక్నీషియన్ అశోక్ మూడో అంతస్తు నుంచి కింద పడిపోయాడు. ప్రత్యక్ష సాక్షుల ప్రకారం, అశోక్ నగ్నంగా ఉన్నాడు. తీవ్ర గాయాలతో ఉన్న అశోక్కు ఆసుపత్రి సిబ్బంది చికిత్స అందించినప్పటికీ, అతడు మృతి చెందాడు.

అయితే, ఆసుపత్రి యాజమన్యం ఈ విషయాన్ని వెంటనే పోలీసులకు లేదా కుటుంబ సభ్యులకు తెలియజేయలేదని, చాలా ఆలస్యంగా సమాచారం అందించిందని అశోక్ బంధువులు ఆరోపించారు. ఆసుపత్రి సిబ్బంది నుంచి ఫోన్ రావడంతోనే తాము ఈ విషయం తెలుసుకున్నామని, ఆ తర్వాత పోలీసులకు ఫిర్యాదు చేశామని వారు తెలిపారు.

ఈ ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు. అశోక్ ఆత్మహత్యకు ప్రయత్నించాడా లేక ఎవరైనా తోసేశారా అనే కోణంలో విచారణ జరుగుతోంది. మృతదేహాన్ని పోస్టుమార్టం కోసం ప్రభుత్వాసుపత్రికి తరలించామని, చట్టపరమైన కార్యక్రమాలు పూర్తి చేసిన తర్వాత కుటుంబానికి అప్పగిస్తామని పోలీసులు పేర్కొన్నారు.

ఆసుపత్రి యాజమన్యం దీనిపై స్పందిస్తూ, నిబంధనల ప్రకారం చికిత్స చేసినట్లు, శవాన్ని చట్టపరమైన ప్రక్రియ తర్వాత అప్పగిస్తామని చెప్పింది. దర్యాప్తు తర్వాతే అసలు విషయం వెల్లడి అవుతుందని పోలీసులు తెలిపారు.