పండరీపురంలో ఆషాడ ఏకాదశి: లక్షలాది భక్తులతో విఠల్ ఆలయం కిటకిట

పండరీపురంలోని శ్రీ విఠల్ రుక్మిణి ఆలయంలో ఆషాడ ఏకాదశి (తొలి ఏకాదశి) సందర్భంగా భక్తుల భారీ తాకిడి నెలకొంది. లక్షల సంఖ్యలో భక్తులు విఠోబా దర్శనం కోసం తరలివచ్చారు. మహారాష్ట్ర, కర్ణాటక, తెలంగాణ సహా వివిధ రాష్ట్రాల నుంచి భక్తులు ఇక్కడికి చేరుకున్నారు.

వార్కరీ సంప్రదాయంలో భాగంగా భక్త తుకారాం, సంత జ్ఞానేశ్వర్ మహారాజ్ పాదుకలను పల్లకీలపై ఊరేగిస్తూ వేలాది మంది కాలినడకన 250 నుంచి 350 కిలోమీటర్లు ప్రయాణించి పండరీపురం చేరుకున్నారు. ఈ రెండు ప్రధాన పల్లకీలు నిన్న రాత్రి 9:30 గంటలకు ఆలయానికి చేరాయి. భక్తులు తెల్లని దుస్తులు ధరించి, భజనలు, అభంగాలు ఆలపిస్తూ, చేతుల్లో చిడతలు, డోలు వంటి వాయిద్యాలతో ఊరేగింపులో పాల్గొన్నారు.

తెల్లవారుజామున 2 గంటలకు మహారాష్ట్ర ముఖ్యమంత్రి ఆలయానికి వచ్చి విశేష పూజల్లో పాల్గొన్నారు. కాకడ ఆరతితో స్వామివారిని మేల్కొలిపి, రుక్మిణి దేవికి, విఠలుడికి పంచామృతాభిషేకం చేశారు. తులసి మాలలు, పూలమాలలతో అలంకరించి వేద మంత్రాలతో ప్రత్యేక పూజలు నిర్వహించారు. రాష్ట్ర ప్రజల శ్రేయస్సు కోసం ప్రార్థించిన తర్వాత సీఎం తిరిగి వెళ్లిపోయారు.

ఈ రెండు రోజులూ ఆలయం మూసివేయకుండా నిరంతరం దర్శనాలు కొనసాగుతాయి. సాధారణ ముఖ దర్శనంతో పాటు పాదస్పర్శ దర్శనానికి 20 నుంచి 24 గంటల వరకు వేచి ఉండాల్సి వస్తోంది. భక్తుల సౌకర్యార్థం క్యూ లైన్లు, బ్యారికేడ్లు ఏర్పాటు చేశారు. భారీ జనసందోహం నేపథ్యంలో ప్రైవేట్ సెక్యూరిటీ సిబ్బందిని కూడా నియమించారు. అధికారులు తొక్కిసలాట నివారణకు ప్రత్యేక చర్యలు తీసుకున్నారు.

మహారాష్ట్రలోని ఈ ప్రాచీన వార్కరీ సంప్రదాయం ఇప్పటికీ అజరామరంగా కొనసాగుతోంది. చిన్నపిల్లల నుంచి వృద్ధుల వరకు తరతరాల భక్తులు ఈ యాత్రను కొనసాగిస్తున్నారు.