IPL పై దావూద్ ఇబ్రాహీం ఒత్తిడి, బెదిరింపులపై లలిత్ మోదీ ఆరోపణలు

IPL మాజీ ఛైర్మన్ లలిత్ మోదీ ఇటీవల లండన్ నుండి ఇచ్చిన ఇంటర్వ్యూలో అండర్‌వరల్డ్ డాన్ దావూద్ ఇబ్రాహీం, అతని D-కంపెనీపై తీవ్ర ఆరోపణలు చేశారు.

IPL పై పట్టు సాధించడానికి, భారీ స్థాయిలో జరిగే అక్రమ బెట్టింగ్ నెట్‌వర్క్‌ను నిర్లక్ష్యం చేయాలని ఒత్తిడి తెచ్చారని ఆయన ఆరోపించారు. మ్యాచ్ ఫిక్సింగ్, స్పాట్ ఫిక్సింగ్‌లకు సహకరిస్తే వందల మిలియన్ డాలర్ల లంచం ఇవ్వడానికి సిద్ధంగా ఉన్నామని ఆఫర్ చేశారని, తాను దానిని తిరస్కరించానని చెప్పారు.

2009 లో సార్వత్రిక ఎన్నికల నేపథ్యంలో IPL రెండవ సీజన్ దక్షిణాఫ్రికాకు మారడంతో దావూద్ బుక్‌మేకర్ల సిండికేట్ వేల కోట్లు నష్టపోయిందని, ఆ నష్టం నుండి తననే లక్ష్యంగా చేసుకున్నారని మోదీ పేర్కొన్నారు. లండన్‌లో ఒక మధ్యవర్తి ద్వారా తనను పిలిపించి, సాటిలైట్ ఫోన్‌లో నేరుగా దావూద్ మాట్లాడుతూ ‘నీ సమస్యలన్నీ తీరుస్తాను, IPL లో మాకు ఒక టీం కావాలి’ అని షరతు విధించారని వివరించారు.

తిరస్కరణ తర్వాత తనపై మూడు హత్యాయత్నాలు జరిగాయని, ముంబైలోని తన ఇంటి బయట కాల్పులు, జోహన్స్‌బర్గ్, క్రొయేషియాల్లో హిట్‌మన్‌లను రంగంలోకి దించడం, లండన్ స్లోన్ స్ట్రీట్‌లో తన కొడుకు కిడ్నాప్ ప్రయత్నం జరిగిందని ఆరోపించారు. చివరకు క్రికెట్ ప్రపంచం నుండి పూర్తిగా తప్పుకుంటానని మాట ఇవ్వడంతో చోటా షకీల్ సమస్యలు తీరిపోయాయని ప్రకటించారని, దీంతో తన ప్రాణాలు దక్కాయని చెప్పారు.

చోటా షకీల్ ఈ ఆరోపాలను ఖండిస్తూ, ఇది కేవలం వ్యాపార, ఆర్థిక వివాదం మాత్రమేనని గతంలో పేర్కొన్నారు. భారత్లో ఆర్థిక నేరాల కేసులు ఎదుర్కొంటూ 2010 నుంచి లండన్‌లో ఉంటున్న మోదీ ఇంత కాలం తర్వాత ఇప్పుడు ఈ ఆరోపణలు ఎందుకు చేస్తున్నారని క్రీడా విశ్లేషకులు ప్రశ్నిస్తున్నారు. ఇదే సమయంలో మోదీ ఇటీవల IPL మ్యాచ్‌లు స్క్రిప్ట్ ప్రకారం జరుగుతాయని చేసిన వ్యాఖ్యలు కూడా చర్చనీయాంశంగా మారాయి.