దావూద్ ఇబ్రహీం బెదిరింపులతోనే క్రికెట్ నుంచి తప్పుకున్నా: లలిత్ మోదీ

ఐపీఎల్ వ్యవస్థాపకుడు లలిత్ మోదీ సంచలన ఆరోపణలు చేశారు. తాను క్రికెట్ పరిపాలన నుంచి వైదొలగడానికి అండర్‌వరల్డ్ డాన్ దావూద్ ఇబ్రహీం నుంచి వచ్చిన ప్రాణహాని బెదిరింపులే ప్రధాన కారణమని తొలిసారి వెల్లడించారు. ఓ ఇంటర్వ్యూలో మాట్లాడుతూ, 2009లో ఐపీఎల్‌ను సౌతాఫ్రికాకు తరలించినప్పుడు దావూద్ సంస్థకు చెందిన బెట్టింగ్ వ్యవహారాల్లో భారీ నష్టం వాటిల్లిందని, ఆ నష్టాన్ని భర్తీ చేయాలని తనపై ఒత్తిడి వచ్చిందని లలిత్ మోదీ చెప్పారు. 'నేను ఎవరినీ బెట్టింగ్ నుండి ఆపలేదు. అది వారి వ్యాపారం, నేను దానిలో లేను. కానీ నన్ను బాధ్యుడిని చేసి డబ్బు ఇవ్వాలని కోరారు. నేను ఒప్పుకోలేదు' అని స్పష్టం చేశారు. ఆ తర్వాతే తనపై ప్రాణహాని బెదిరింపులు మొదలయ్యాయని, మీడియా, ప్రభుత్వ ఒత్తిళ్లతో పాటు ఈ బెదిరింపులే తన నిర్ణయానికి ముఖ్య కారణమని చెప్పారు. 'క్రికెట్ నుంచి రిటైర్ అవుతాను అని మాట ఇచ్చాను. అది దావూద్ వల్లే' అని లలిత్ మోదీ తెలిపారు. దావూద్ ఇబ్రహీం భారతదేశం కోరుతున్న ఉగ్రవాది, 1993 ముంబై బాంబు పేలుళ్లలో ప్రధాన నిందితుడు. అతని ముఠాకు క్రికెట్ బెట్టింగ్, మ్యాచ్ ఫిక్సింగ్‌తో సంబంధాలు ఉన్నట్లు గతంలోనూ ఆరోపణలు వచ్చాయి. లలిత్ మోదీ 2010లో బీసీసీఐ ఆర్థిక అక్రమాల ఆరోపణల నేపథ్యంలో ఐపీఎల్ నుంచి తొలగించబడ్డారు. ఆయన ఇప్పుడు లండన్‌లో నివసిస్తున్నారు.