"నేను బ్యాంకుల రుణాలు తీసుకోలేదు, డబ్బు ఇచ్చిందే తప్ప తీసుకోలేదు" : లలిత్ మోదీ

ఐపీఎల్ మాజీ చైర్మన్ లలిత్ మోదీ, విజయ్ మాల్యాతో తనను పోల్చడాన్ని తీవ్రంగా తిప్పికొట్టారు. తన వ్యాపారాలు ఎప్పుడూ బ్యాంకు రుణాలపై ఆధారపడలేదని, తాను డబ్బు తీసుకోవడం కంటే ఇచ్చిందే ఎక్కువ అని ఆయన చెప్పారు. ఇండియా టుడేతో ఇంటర్వ్యూలో లలిత్ మోదీ మాట్లాడుతూ, "విజయ్ మాల్యా నా స్నేహితుడే, కానీ అతని సమస్య బ్యాంకులతో ముడిపడి ఉంది. నేను ఎప్పుడూ ఎవరి దగ్గరా డబ్బు తీసుకోలేదు. డబ్బు ఇచ్చాను, చెల్లించాను మాత్రమే. మా వ్యాపారాలకు బ్యాంకు రుణాలు, ప్రభుత్వ కాంట్రాక్టులు ఏమీ లేవు. మేము కన్స్యూమర్ బ్రాండ్లు. ప్రపంచంలో నంబర్ వన్ బ్రాండ్ మార్ల్బోరో మాదే, లైసెన్సీ కాదు, యజమానులం" అని స్పష్టం చేశారు.

తన వ్యాపార ప్రస్థానం గురించి మాట్లాడుతూ, "నేను ఈఎస్పీఎన్ ఛానల్‌తోపాటు భారతదేశంలో మొట్టమొదటి కేబుల్ నెట్‌వర్క్, పెయిడ్ ఛానల్ మోదీ ఎంటర్‌టైన్‌మెంట్ స్థాపించాను. స్టార్ టీవీ ఛానళ్లు రాకముందే ఇవన్నీ చేశాను. వందల కోట్ల డాలర్లు సంపాదించాను. కుటుంబం డబ్బు కాదు, సొంతంగా సంపాదించింది. కాబట్టి నా డబ్బును నాకు ఇష్టం వచ్చినట్లు ఖర్చు చేయడానికి నాకు హక్కు లేదా?" అని ప్రశ్నించారు. లలిత్ మోదీ ఈడీ, సీబీఐ విచారణ ఎదుర్కొంటున్న విషయం తెలిసిందే. విజయ్ మాల్యా వేల కోట్ల రూపాయల బ్యాంకు రుణాలు తిరిగి చెల్లించకుండా విదేశాలకు పారిపోయారనే ఆరోపణలు ఉన్నాయి. ఈ నేపథ్యంలో లలిత్ మోదీ తన వ్యాపార నమూనా వేరని, రుణాల జోలికి వెళ్ళలేదని చెబుతూ ఇద్దరి మధ్య వ్యత్యాసాన్ని స్పష్టం చేశారు.