గిన్నిస్ రికార్డు హోల్డర్ లతీఫ్ చిన్ననాటి పలకతో కుమారుడి పెళ్లి పత్రిక తయారు

కేరళలోని కోజికోడ్ జిల్లా నడక్కావుకు చెందిన లతీఫ్, గిన్నిస్ వరల్డ్ రికార్డ్ హోల్డర్, తన కుమారుడి వివాహానికి చెక్క పలకతో శుభలేఖ తయారు చేశారు.

లతీఫ్ 2024లో ప్రపంచంలోనే అత్యధిక పెళ్లి పత్రికలను సేకరించిన వ్యక్తిగా గిన్నిస్ రికార్డ్ సాధించారు. తన కుమారుడి పెళ్లి శుభలేఖ ప్రత్యేకంగా ఉండాలని ఆయన భావించారు. గతంలో రాజస్థాన్ పర్యటనలో పాతకాలం నాటి చెక్క పలకను చూసి స్ఫూర్తి పొందారు. దీంతో పలకనే పెళ్లి పత్రికగా తయారు చేయాలని నిర్ణయించారు.

చెక్క పలకతో రూపొందించిన ఈ శుభలేఖ బరువు 800 గ్రాములు. పరిమాణం కారణంగా నేరుగా ఇంటింటికీ ఇవ్వడం సాధ్యం కాకపోవడంతో లతీఫ్ పార్సెల్ ద్వారా బంధువులు, స్నేహితులకు పంపారు. డిజిటల్ యుగంలో మనుషుల మధ్య సంబంధాలు తగ్గిపోతున్నాయని, పలక శుభలేఖ చిన్ననాటి జ్ఞాపకాలను గుర్తు చేస్తుందని ఆయన తెలిపారు.

ఈ వినూత్న పలక శుభలేఖ ప్రస్తుతం సోషల్ మీడియాలో వైరల్‌గా మారింది.