నిమ్మ తోటల్లో చీడపీడల నివారణ: శాస్త్రవేత్త సూచనలు

ఆంధ్రప్రదేశ్, తెలంగాణలో నిమ్మ సాగు విస్తృతంగా ఉంది. కృష్ణ, గుంటూరు, గోదావరి, నెల్లూరు, ప్రకాశం, నల్గొండ జిల్లాల్లో నిమ్మ తోటలు ఎక్కువ. అయితే నల్లి పురుగులు, గొంగళి పురుగులు, గజ్జి తెగులు రైతులకు సమస్యగా మారాయి. వీటి వల్ల కాయ నాణ్యత తగ్గి, దిగుబడి దెబ్బతింటుందని ఖమ్మం జిల్లా వైరా కృషి విజ్ఞాన కేంద్రం శాస్త్రవేత్త డాక్టర్ కే. రవి కుమార్ తెలిపారు.

నల్లి పురుగుల్లో ఆకుపచ్చ నల్లి, మంగు నల్లి అనే రెండు రకాలు ఉంటాయి. ఇవి ఆకులు, కాయల నుంచి రసం పీలుస్తాయి. దీంతో కాయలపై తెలుపు, గోధుమ రంగు మచ్చలు ఏర్పడతాయి. నివారణకు వెటబుల్ సల్ఫర్ (3 గ్రా/లీ), డైకోఫాల్ (3 మి.లీ/లీ), ప్రొపోర్గేట్ (1 మి.లీ/లీ) వంటి పురుగు మందులను మారుస్తూ పిచికారి చేయాలని సూచించారు. గొంగళి పురుగులు ఆకులను తిని రంధ్రాలు చేస్తాయి. వీటి నియంత్రణకు క్లోరోపైరిఫాస్ (2.5 మి.లీ/లీ), డైమీథోయేట్ (2 మి.లీ/లీ), డైక్లోరోవాస్ (1 మి.లీ/లీ) ఉపయోగించాలి.

గజ్జి తెగులు (క్యాంకర్) చెట్ల కొమ్మలు, కాండం, కాయలను ప్రభావితం చేస్తుంది. తీవ్రమైతే చెట్లు ఎండిపోతాయి. నివారణగా 10 లీటర్ల నీటికి 30 గ్రాముల కాపర్ ఆక్సీక్లోరైడ్, 1 గ్రాము స్ట్రెప్టోసైక్లిన్ కలిపి 20 రోజుల వ్యవధిలో 2-3 సార్లు పిచికారి చేయాలి. తెగులును తట్టుకునే 'బాలాజీ' రకం సాగు చేస్తే మంచి ఫలితం ఉంటుందని డాక్టర్ రవి కుమార్ తెలిపారు.

ఏటా మే-జూన్లో ఎండు కొమ్మలను కత్తిరించి చెట్లకు గాలి, వెలుతురు సరిగా వచ్చేలా చేస్తే గజ్జి తెగులు రాకుండా నియంత్రించవచ్చు.