సత్యనపల్లి సెమీ ఓపెన్ జైలు నుంచి జీవిత ఖైదీ పరారు

గుంటూరుకు చెందిన తమ్మిశెట్టి శ్రీనివాసరావు అనే జీవిత ఖైదీ సత్యనపల్లిలోని సెమీ ఓపెన్ జైలు నుంచి పారిపోయాడు. ఈ నెల 25వ తేదీ ఉదయం 11:30 గంటలకు అతను పరారయ్యాడు.

శ్రీనివాసరావు గుంటూరు అర్లపాట పోలీస్ స్టేషన్ పరిధిలో నమోదైన 394/2015 హత్య కేసులో శిక్ష అనుభవిస్తున్నాడు. ఐదేళ్లుగా నెల్లూరు జైలులో ఉన్న అతన్ని ఈ ఏడాది ఫిబ్రవరిలో జైలు శాఖ కమిటీ సిఫారసు మేరకు సత్యనపల్లిలోని ఓ పెట్రోల్ బంకులో పనికి నియమించారు.

నాలుగు నెలలుగా పెట్రోల్ బంకులో పని చేస్తున్న శ్రీనివాసరావు సిబ్బంది కళ్ళు కప్పి స్థానికుడి ద్విచక్ర వాహనంపై పరారయ్యాడు. బెయిల్ కోసం హైకోర్టులో దరఖాస్తు చేసుకున్న అతనికి తీర్పు ఆలస్యమవడంతో పారిపోయినట్లు పోలీసులు అనుమానిస్తున్నారు.

సబ్జైల్ పర్యవేక్షణ అధికారి వెంకటరత్నం సత్యనపల్లి టౌన్ పోలీస్ స్టేషన్‌లో ఫిర్యాదు చేశారు. పోలీసులు కేసు నమోదు చేసి ప్రత్యేక బృందాలతో గాలిస్తున్నారు. శ్రీనివాసరావు ఎక్కడ కనిపించినా సత్యనపల్లి టౌన్ ఇన్స్పెక్టర్ నంబర్ 9440796230 లేదా DSP నంబర్ 9440796208కు సమాచారం అందించాలని పోలీసులు కోరారు.