మద్యం కుంభకోణం కేసు: కిరణ్ కుమార్ రెడ్డి శంషాబాద్ విమానాశ్రయంలో అరెస్ట్

మద్యం కుంభకోణం కేసులో నిందితుడైన ఈశ్వర్ కిరణ్ కుమార్ రెడ్డిని శంషాబాద్ విమానాశ్రయంలో SIT అధికారులు అరెస్ట్ చేశారు. ఆయన దుబాయ్ నుంచి శ్రీలంక మీదుగా భారత్‌కు తిరిగి వస్తుండగా లుకౌట్ నోటీసు ఆధారంగా ఇమ్మిగ్రేషన్ అధికారులు గుర్తించారు. అనంతరం SIT అధికారులకు అప్పగించారు.

సుప్రీంకోర్టు ముందస్తు బెయిల్ పిటిషన్‌ను తిరస్కరించడంతో, విచారణాధికారి ముందు లొంగిపోవాలని కోర్టు ఆదేశించింది. దీంతో ఆయన భారత్‌కు వచ్చారు. విమానాశ్రయంలోనే SIT అధికారులు ఆయనను అదుపులోకి తీసుకున్నారు.

కిరణ్ కుమార్ రెడ్డి తిరుపతికి చెందిన వ్యక్తి. ఆయన తండ్రి పోలీసు కానిస్టేబుల్‌గా పనిచేశారు. ఐఐటీ ఖరక్‌పూర్‌లో ఇంజనీరింగ్ చదివిన ఆయన, రాజ్ కెసి రెడ్డి అనే వ్యక్తితో కలిసి ‘టెక్కర్’ అనే డొల్ల కంపెనీ ఏర్పాటు చేసినట్లు SIT విచారణలో తేలింది. ఈ కుంభకోణంలో ముడుపుల సొమ్ము దారి మళ్లించడంలో ఈ కంపెనీ కీలక పాత్ర పోషించినట్లు అధికారులు గుర్తించారు.

ఇదే కేసులో మరో నిందితుడు సైఫ్ అహ్మద్ కూడా భారత్‌కు తిరిగి వస్తున్నట్లు సమాచారం. ఆయన ఇప్పటికే విజయవాడ ACB కోర్టులో లొంగుబాటు పిటిషన్ దాఖలు చేశారు. కిరణ్ కుమార్ రెడ్డిని SIT తీవ్రంగా విచారిస్తోంది. దీని ద్వారా కుంభకోణానికి సంబంధించిన మరిన్ని వివరాలు వెలుగులోకి వస్తాయని భావిస్తున్నారు.