అల్పపీడనం.. తెలుగు రాష్ట్రాల్లో వచ్చే 48 గంటల్లో భారీ వర్షాలు

ఛత్తీస్‌గడ్ మరియు ఉత్తర ఒడిశా మీదుగా వెళుతున్న అల్పపీడనం రాబోయే 24 గంటల్లో మధ్యప్రదేశ్ వైపు వెళ్లనుంది. ఈ నేపథ్యంలో AP విపత్తు నిర్వహణ సంస్థ ఇవాళ రాష్ట్రంలో మేఘావృతమై ఉంటుందని, తేలికపాటి నుండి మోస్తరు వర్షాలు కురిసే అవకాశం ఉందని తెలిపింది.

కోస్తాంధ్ర, రాయలసీమ జిల్లాల్లో ఉరుములు, మెరుపులతో కూడిన జల్లులు పడతాయి. పొలవరం, ఏలూరు, పశ్చిమ గోదావరి జిల్లాల్లో మోస్తరు వర్షాలు; శ్రీకాకుళం, పార్వతీపురం మన్యం, అల్లూరి సీతారామరాజు, కాకినాడ, కోనసీమ, తూర్పు గోదావరి, కృష్ణ, ఎన్టీఆర్, గుంటూరు, బాపట్ల, పల్నాడు జిల్లాల్లో తేలికపాటి నుండి మోస్తరు వర్షాలు; మార్కాపురం, నెల్లూరు, శ్రీ సత్యసాయి, వైఎస్సార్ కడప జిల్లాల్లో తేలికపాటి చినుకులు పడే సూచనలు ఉన్నాయి.

వర్షాలు కురిసే సమయంలో గంటకు 40 నుండి 50 కి.మీ. వేగంతో గాలులు వీస్తాయని అధికారులు హెచ్చరించారు. ఉరుములు మెరుపులు ఉండటంతో ప్రజలు చెట్ల కింద, భారీ హోర్డింగుల దగ్గర నిలబడవద్దని, పడిపోయిన విద్యుత్ తీగలకు దూరంగా ఉండాలని సూచించారు.

తెలంగాణలో వాతావరణ శాఖ అధికారులు భారీ వర్ష సూచన చేశారు. ఆదిలాబాద్, ఆసిఫాబాద్, కామారెడ్డి, మెదక్, సంగారెడ్డి జిల్లాల్లో భారీ వర్షాలు, హైదరాబాద్, సిరిసిల్ల, సిద్దిపేట జిల్లాల్లో మోస్తరు వర్షాలు కురిసే అవకాశం ఉంది. భారీ వర్షాల నేపథ్యంలో ప్రజలు అప్రమత్తంగా ఉండాలని, అవసరమైతే సురక్షిత ప్రాంతాలకు వెళ్లాలని అధికారులు సూచించారు.