యుద్ధవీరుల వారసులు.. ఇప్పుడు తిండి కోసం విన్యాసాలు: మాదిగ మాస్టిన్ల కష్టాల కథ

ఉమ్మడి ఉభయ గోదావరి జిల్లాల్లోని మాదిగ మాస్టిన్లు అనే సాంప్రదాయ కళాకారులు అపారమైన శారీరక బలాన్ని ప్రదర్శిస్తూనే, జీవనోపాధి కోసం నిత్యం పోరాడుతున్నారు. వీరు ట్రాక్టర్లను తల వెంట్రుకలతో లాగడం, భారీ రాళ్లను గాల్లోకి ఎగరేసి వీపుతో ఆపడం, కొబ్బరికాయలను తలతో పగలగొట్టడం వంటి ప్రమాదకరమైన విన్యాసాలు చేస్తారు.

చరిత్ర ప్రకారం, వీరి పూర్వీకులు విజయనగర సామ్రాజ్యంలో శ్రీకృష్ణదేవరాయల కాలంలో యోధులుగా పనిచేశారు. రాజ్యాలు అంతరించిన తర్వాత, తమ శక్తి సామర్థ్యాలను ప్రదర్శనల రూపంలో ప్రజల ముందు చూపిస్తూ పొట్టపోసుకుంటున్నారు. ప్రస్తుతం ఈ ప్రాంతంలో వేళ్లతో లెక్కించదగ్గ కళాకారులు మాత్రమే మిగిలారు.

కానీ వీరి జీవితం చాలా కష్టంగా మారింది. కనీసం కుల ధృవీకరణ పత్రాలు కూడా సక్రమంగా అందడం లేదని వీరు ఆవేదన వ్యక్తం చేస్తున్నారు. "మాకు వేరే కూలి పని చేయలేం. ప్రభుత్వం నుంచి ఎలాంటి సాయం లేదు. ఈ విన్యాసాలు చేస్తూ వచ్చిన రూపాయలతోనే పిల్లల్ని పోషించుకుంటున్నాం" అని ఒక కళాకారుడు తెలిపారు.

ఈ కళాకారుల విన్యాసాలను వీక్షించిన ఏపీ ప్రభుత్వ విప్ బొలిశెట్టి శ్రీనివాస్ స్పందించారు. వీరి విషయాన్ని ప్రభుత్వ దృష్టికి తీసుకెళ్తానని హామి ఇచ్చారు. ఇలాంటి ప్రతిభావంతులను క్రీడా రంగానికి పంపించి ప్రోత్సహించాల్సిన అవసరం ఉందని ఆయన అన్నారు.