మహబూబాబాద్‌లో వర్షాలు, ఈదురుగాలులకు వందల ఎకరాల పంట నష్టం

తుఫాను ప్రభావంతో మహబూబాబాద్ జిల్లాలో భారీ వర్షాలు కురుస్తున్నాయి. ఈదురుగాలులు కూడా వీచుతున్నాయి. దీంతో వందల ఎకరాల పంట నష్టం జరిగింది.

మహబూబాబాద్, బయ్యారం, గార్ల, కొత్తగూడ, గంగారం మండలాల్లో తుఫాను ప్రభావం ఎక్కువగా కనిపిస్తోంది. బయ్యారం, గార్ల, కురవి మండలాల్లో వందల ఎకరాల వరి పంట పొలాలు నేలకొరిగాయి. మాజీ వరంగల్ జిల్లా పరిధిలో భారీ వర్షాలు, గాలులు కొనసాగుతున్నాయి.

పంట కోత దశకు వచ్చిన సమయంలోనే నేలకొరగడంతో రైతులు ఆందోళన చెందుతున్నారు. మూడు రోజులుగా వర్షాలు కురుస్తున్నాయని రైతులు చెబుతున్నారు.

ఒక ఎకరా వరి, ఒక ఎకరా పత్తి, ఒక ఎకరా తోట పంటలు పూర్తిగా దెబ్బతిన్నాయని ఓ రైతు తెలిపారు. తమ పంటలు నష్టపోయాయని, ప్రభుత్వం సహాయం అందించాలని రైతులు కోరుతున్నారు.