తెలంగాణలో 9 ఉమ్మడి జిల్లా కేంద్రాల్లో మహిళా శక్తి సూపర్ బజార్లు

తెలంగాణ ప్రభుత్వం మహిళా స్వయం సహాయక సంఘాల ఆర్థిక సాధికారత కోసం 'మహిళా శక్తి సూపర్ బజార్లు' ఏర్పాటు చేయనుంది. ముఖ్యమంత్రి రేవంత్ రెడ్డి ఆదేశాల మేరకు ఈ ప్రాజెక్టుకు రూపకల్పన జరిగింది.

తొలి దశలో రాష్ట్రంలోని తొమ్మిది ఉమ్మడి జిల్లా కేంద్రాల్లో ఈ సూపర్ బజార్లు ప్రారంభమవుతాయి. హైదరాబాద్, వరంగల్, కరీంనగర్, ఆదిలాబాద్, నిజామాబాద్, ఖమ్మం, నల్గొండ, మహబూబ్ నగర్, సంగారెడ్డి జిల్లాల్లో ఒక్కొక్కటి చొప్పున షాపింగ్ కాంప్లెక్స్‌లు నిర్మించనున్నారు. ఒక్కో బజార్‌కు సుమారు 5,000 గజాల స్థలం అవసరమని అంచనా వేశారు. ప్రభుత్వ భూములను సేకరించాలని జిల్లా కలెక్టర్లకు ఆదేశాలు వెళ్లాయి.

ఖమ్మం జిల్లాను రోల్ మోడల్‌గా తీసుకున్న ప్రభుత్వం అక్కడ అదనంగా లాజిస్టిక్ హబ్, ఆధునిక రైస్ మిల్లు ఏర్పాటు చేయనుంది. ఇందుకు 20 ఎకరాల భూమిని రెవెన్యూ శాఖ మంత్రి పొంగులేటి శ్రీనివాస్ రెడ్డి కేటాయించడానికి అంగీకారం తెలిపారు.

ఈ సూపర్ బజార్లు కార్పొరేట్ రిటైల్ మోడల్‌లో నడుస్తాయి. నిత్యవసరాలు, గృహోపకరణాలు మార్కెట్ ధర కంటే తక్కువకు లభిస్తాయి. మహిళా సంఘాలు రైతుల నుంచి ధాన్యం సేకరించడం, మిల్లింగ్, ప్యాకేజింగ్, సొంత రవాణా వ్యవస్థ ద్వారా రాష్ట్రవ్యాప్తంగా సప్లై చేస్తాయి. మధ్యవర్తులు లేకపోవడంతో లాభాలు నేరుగా మహిళా సంఘాలకు చేరతాయి. స్థానిక మహిళా సమైక్యాలకు నిర్వహణ బాధ్యతలు అప్పగించి లాభాలలో భాగస్వామ్యం కల్పించనున్నారు.

ఈ మోడల్ విజయవంతమైతే రాష్ట్రవ్యాప్తంగా అన్ని నియోజకవర్గాలు, మండలాల్లో విస్తరించాలని ప్రభుత్వం యోచిస్తోంది.