సర్కార్ బడికి పిల్లల్ని పంపిస్తే ఇంటి పన్ను మాఫీ: వరంగల్ జిల్లా సర్పంచ్ ఆఫర్

వరంగల్ జిల్లా దుగ్గోని మండలం మైసంపల్లి గ్రామంలో మూతపడే దశలో ఉన్న ప్రభుత్వ పాఠశాలను కాపాడేందుకు సర్పంచ్ ఇంద్రదేవ, వార్డ్ మెంబర్లు చొరవ తీసుకున్నారు. పిల్లలను ఈ పాఠశాలకు పంపించే తల్లిదండ్రులకు ఇంటి పన్ను, నీటి పన్ను మాఫీ చేస్తామని ప్రకటించారు.

అంతేకాకుండా, పిల్లల రాకపోకలకు ఉచిత ఆటో సౌకర్యం కూడా కల్పిస్తామన్నారు. ఈ ఆఫర్‌తో ఇప్పటికే ఆరుగురు పిల్లలు పాఠశాలలో చేరినట్లు స్థానిక వర్గాలు తెలిపాయి. సర్పంచ్ ఇంటింటికీ వెళ్లి తల్లిదండ్రులకు అవగాహన కల్పించారు.

గ్రామ పంచాయతీ ఈ నిర్ణయాన్ని ఏకగ్రీవంగా తీర్మానం చేసింది. ప్రభుత్వ పాఠశాలలో విద్యార్థుల సంఖ్య పెంచేందుకు ఈ చర్యలు తీసుకుంటున్నట్లు సర్పంచ్ తెలిపారు.