టీఎంసీలో తీవ్ర అంతర్గత సంక్షోభం: మమతా బెనర్జీకి రితబ్రత షాక్

పశ్చిమ బెంగాల్ అసెంబ్లీ స్పీకర్ తృణమూల్ కాంగ్రెస్ తిరుగుబాటు నేత రితబ్రత బెనర్జీని ప్రతిపక్ష నేతగా గుర్తించారు. ఈ నిర్ణయం మమతా బెనర్జీ నేతృత్వంలోని టీఎంసీలో పెను ప్రకంపనలు సృష్టించింది.

పార్టీలోని 80 మంది ఎమ్మెల్యేలలో 58 మంది రితబ్రత వర్గానికి మద్దతు తెలిపినట్లు సమాచారం. దీంతో స్పీకర్ అధికారిక ప్రతిపక్ష నేతగా ఆయనను ప్రకటించారు. మమతా మాత్రం శోభన్దేవ్ చటోపాధ్యాయ పేరును ప్రతిపాదించారు. అయితే ఆ లేఖలోని సంతకాలు నకిలీవని రితబ్రత వర్గం ఆరోపించిన నేపథ్యంలో రాష్ట్ర సీఐడీ దర్యాప్తు ప్రారంభించింది.

ఈ పరిణామాల మధ్య మమతా బెనర్జీకి అత్యంత సన్నిహితుడైన కోల్కతా మేయర్ ఫిర్హాద్ హకీమ్ తన పదవికి రాజీనామా చేశారు. 2018 నుంచి మేయర్‌గా ఉన్న ఆయన మారిన రాజకీయ పరిస్థితుల్లో బాధ్యతలు నిర్వహించడం కష్టమని చెప్పారు. మమతా పార్టీలోని అన్ని కమిటీలు, అనుబంధ విభాగాలను రద్దు చేసి భవిష్యత్ కార్యాచరణపై పునరాలోచన ప్రకటించారు.

పార్టీ వర్గాల సమాచారం ప్రకారం త్వరలో లోక్‌సభ, రాజ్యసభలోనూ చీలికలు ఏర్పడే అవకాశం ఉందని ప్రచారం జరుగుతోంది. రితబ్రత వర్గం ఎన్నికల సంఘాన్ని ఆశ్రయించి అధికారిక గుర్తింపు కోరే అవకాశం ఉందని విశ్లేషకులు అంటున్నారు. ఈ సంక్షోభ సమయంలో మమతా బెనర్జీ జూన్ 8న జరిగే ఇండియా కూటమి సమావేశంలో అభిషేక్ బెనర్జీతో కలిసి పాల్గొననున్నారు.