కొమ్మనాపల్లిలో మామిడి తాండ్ర తయారీ: కుటీర పరిశ్రమగా వెలుగొందుతున్న కళ

కాకినాడ జిల్లా తొండంగి మండలం కొమ్మనాపల్లిలో మామిడి తాండ్ర తయారీ పెద్ద ఎత్తున కొనసాగుతోంది. వేసవి కాలంలో ఈ కుటీర పరిశ్రమ ద్వారా దాదాపు 20-30 మంది కార్మికులకు ఉపాధి లభిస్తోంది.

తాండ్ర తయారీకి నూజివీడు నుంచి పక్వానికి వచ్చిన మామిడికాయలను లారీల్లో దిగుమతి చేసుకుంటారు. ముందుగా గుజ్జు తీసి, ఆ రసాన్ని జల్లిట్లో పోసి, బెల్లం కలిపి ఉడికిస్తారు. తర్వాత ఈ రసాన్ని పొరలు పొరలుగా చాపలపై ఆరబెడతారు. రోజుకు ఎనిమిది పొరల వరకు వేస్తారు. పూర్తిగా ఎండబెట్టడానికి 20 నుంచి 25 రోజుల సమయం పడుతుంది. ఆ తర్వాత ముక్కలుగా కోసి ప్యాక్ చేస్తారు.

కార్మికులు ఉదయం 9 నుంచి మధ్యాహ్నం 2 వరకు పనిచేస్తారు. సాయంత్రం వర్షం నుంచి రక్షించడానికి తారపట్టాలు కప్పేస్తారు. ఈ విధానం ద్వారా తయారయ్యే తాండ్ర గుంటూరు, విజయవాడ, హైదరాబాద్, శ్రీకాకుళంతో పాటు మహారాష్ట్ర, మధ్యప్రదేశ్, ఢిల్లీ, బీహార్, ఒడిస్సా, పశ్చిమ బెంగాల్ వంటి రాష్ట్రాలకు ఎగుమతి అవుతోంది. పెద్ద కంపెనీలు ఢిల్లీ, ముంబై, కలకత్తా వంటి నగరాలకు సరఫరా చేస్తాయి.

కార్మికులు నెలకు 20,000 నుంచి 30,000 రూపాయలు సంపాదిస్తున్నారు. కేవలం వేసవిలోనే కాకుండా, కొందరు సంవత్సరం పొడవునా మామిడి రసాన్ని నిల్వచేసి తాండ్ర తయారీ కొనసాగిస్తున్నారు.