మంచిర్యాలలో రౌడీ షీటర్లకు నగర బహిష్కరణ.. ఆరుగురికి ఆరు నెలల నోటీసులు

మంచిర్యాల జిల్లాలో పోలీసులు రౌడీ షీటర్లపై చర్యలు ముమ్మరం చేశారు. మందమర్రి, మంచిర్యాల, శ్రీరాంపూర్ ప్రాంతాలకు చెందిన తొమ్మిది మందిని నగర బహిష్కరణ చేయాలని పోలీసులు నివేదిక సిద్ధం చేశారు. ఇప్పటికే ఆరుగురికి నోటీసులు అందజేశారు.

నోటీసులు అందుకున్న వారు ఆరు నెలల పాటు ఈ ప్రాంతాలకు రాకూడదని ఆదేశాలు ఇచ్చారు. శాంతిభద్రతలకు భంగం కలిగించే వారిపై ఉన్నతాధికారుల ఆదేశాలతో చర్యలు తీసుకుంటున్నారు. బైండ్ ఓవర్లు, కేసులు, అరెస్టులతో పాటు PD Act కూడా అమలు చేస్తున్నారు.

జిల్లాలో ఇటీవల ఎమ్మెల్యే ప్రేమసాగర్ రావు, మంత్రి వివేక్ అనుచరుల మధ్య గొడవలు, దాడులు జరిగాయి. దండేపల్లి, మందమర్రి, శ్రీరాంపూర్ ఏరియాల్లో రాత్రిపూట ఇళ్లపై దాడులు జరిగినట్టు పోలీసులు గుర్తించారు. గంజాయి సంబంధిత కేసులు కూడా పెరుగుతున్నాయి.

రౌడీ షీట్లు, సస్పెక్ట్ షీట్లు ఉన్న వారి ఇళ్లకు పోలీసులు వెళ్లి వారి ప్రవర్తనపై ఆరా తీస్తున్నారు. SB Intelligence, ప్రత్యేక పోలీస్ బృందాలతో నిఘా ఏర్పాటు చేశారు. పోలీసు చర్యలకు భయపడి కొందరు మంచిర్యాల నుంచి హైదరాబాద్, ఇతర ప్రాంతాలకు వెళ్లినట్టు సమాచారం.

నేరస్తుల్లో పరివర్తన కోసం అవగాహన సదస్సులను కూడా నిర్వహిస్తున్నారు.