అమీన్‌పూర్‌లో వరుస దొంగతనాలు చేసిన నిందితుడి అరెస్ట్: 45 తులాల బంగారం స్వాధీనం

సంగారెడ్డి జిల్లా అమీన్‌పూర్ పోలీసులు వరుస దొంగతనాలకు పాల్పడిన నిందితుడిని అరెస్ట్ చేశారు. నాగర్కర్నూల్ జిల్లాకు చెందిన మండ్ల శివ అలియాస్ ఎర్ర శివను మీర్‌పేట ప్రాంతంలో అరెస్ట్ చేశారు.

నిందితుడు జీవనోపాధి కోసం హైదరాబాద్ వచ్చి వడ్రంగి పనిలో చేరాడు. తర్వాత దొంగతనాలకు పాల్పడ్డాడు. పగటి పూట తాళం వేసిన ఇళ్లను లక్ష్యంగా చేసుకున్నాడు. గాంధీగూడెం బంధం కొమ్మోం, బీరంగూడా ప్రాంతాల్లో మూడు ఇళ్లలో చొరబడి నగదు, నగలు దొంగిలించాడు.

పోలీసులు నిందితుడి నుండి 45 తులాల బంగారం, 10 తులాల వెండి స్వాధీనం చేసుకున్నారు. మొత్తం 51 తులాల బంగారం పోగా ఇప్పటివరకు 45 తులాలు రికవరీ అయ్యాయి. మిగిలిన బంగారం ఒక ఫైనాన్స్ సంస్థలో తాకట్టు పెట్టినట్లు తెలిసింది. దాన్ని కూడా రికవరీ చేసే ప్రయత్నం చేస్తామని పోలీసులు తెలిపారు.

నిందితుడికి మల్కాజగిరి జోన్‌లో గతంలో 21 కేసులు నమోదయ్యాయని పోలీసులు తెలిపారు. PD Act కింద చర్యలు తీసుకునే అవకాశాలను పరిశీలిస్తున్నట్లు అధికారులు పేర్కొన్నారు. దొంగతనానికి ఉపయోగించిన స్కూటీని కూడా స్వాధీనం చేసుకున్నారు.