తిరువన్నామలై అరుణాచలేశ్వర ఆలయంలో గుహలో ఇరుక్కుపోయిన భక్తుడు మృతి

తిరువన్నామలై, తమిళనాడు: అరుణాచలేశ్వర స్వామి ఆలయంలోని గిరిప్రదక్షిణ మార్గంలో ఉన్న ఇరిక్కి వినాయకుడు గుహలో ఆంధ్రప్రదేశ్‌కు చెందిన మణికుమార్ అనే భక్తుడు ఊపిరాడక మృతి చెందాడు.

మణికుమార్ కుటుంబంతో కలిసి ఈ ఆలయాన్ని సందర్శించాడు. గుహ ఆకారంలో ఉండే ఈ ఆలయంలో భక్తులు వెనుక ద్వారం నుంచి పాకుతూ లోపలికి వెళ్లడం సాంప్రదాయం. అయితే శరీరాకృతి కారణంగా ఆయన గుహ మధ్యలోనే చిక్కుకుపోయాడు. కుటుంబ సభ్యులు, ఇతర భక్తులు అతన్ని బయటకు తీసేందుకు ప్రయత్నించినా సాధ్యపడలేదు.

ఊపిరాడక అపస్మారక స్థితికి చేరుకున్న మణికుమార్‌ను తీవ్ర ప్రయత్నాల తర్వాత బయటకు తీసి 108 అంబులెన్సులో తిరువన్నామలై ప్రభుత్వ ఆసుపత్రికి తరలించారు. అయితే ఆసుపత్రికి చేరుకునే లోపే మృతి చెందినట్టు వైద్యులు నిర్ధారించారు.

తిరువన్నామలై తాలూకా పోలీసులు ఘటనాస్థలానికి చేరుకొని కుటుంబ సభ్యుల ఫిర్యాదు మేరకు కేసు నమోదు చేసి దర్యాప్తు ప్రారంభించారు. పోస్ట్మార్టం అనంతరం మృతదేహాన్ని కుటుంబానికి అప్పగిస్తామని పోలీసులు తెలిపారు.

ఈ ఘటనపై ఆలయ అధికారులు స్పందించి, గుహలోకి ప్రవేశించే భక్తులకు సరైన మార్గదర్శనం లేకపోవడంతో ప్రమాదాలు జరుగుతున్నాయని ఒప్పుకున్నారు. గుహ ప్రవేశ నియంత్రణను కట్టుదిట్టం చేస్తామని హామీ ఇచ్చారు. ప్రతి నెల పౌర్ణమి రోజున లక్షలాది మంది భక్తులు ఈ ప్రాంతంలో గిరిప్రదక్షిణ చేస్తుంటారు. ఇరిక్కి వినాయకుడు గుహలో ప్రవేశించడం సంప్రదాయంగా వస్తున్నా, శరీరాకృతి వల్ల ఇలాంటి ప్రమాదాల అవకాశం ఉందని స్థానికులు అంటున్నారు.