ఏపీలో నేడు మన్యం బంద్: 100% ఎస్టీ రిజర్వేషన్, 1/70 చట్ట పరిరక్షణ డిమాండ్

ఆంధ్రప్రదేశ్‌లోని షెడ్యూల్డ్ ప్రాంతాల్లో ఈరోజు మన్యం బంద్ జరుగుతోంది. ఆదివాసీ జేఏసీ, గిరిజన సంఘాలు ఈ బందుకు పిలుపునిచ్చాయి.

100% ఎస్టీ రిజర్వేషన్ కల్పించే చట్టాన్ని రూపొందించాలని, గిరిజన భూములను గిరిజనేతరులకు బదిలీ చేయకుండా రక్షించే 1/70 చట్టాన్ని పరిరక్షించాలని డిమాండ్ చేస్తున్నారు. సుప్రీంకోర్టులో ఈ చట్టంపై రాష్ట్ర ప్రభుత్వం బలమైన కౌంటర్ దాఖలు చేయాలని కోరుతున్నారు.

ఏజెన్సీ ప్రాంతాల్లోని స్థానిక ప్రభుత్వ ఉద్యోగాలను ఎస్టీలకే కేటాయించేలా ప్రభుత్వం చర్యలు తీసుకోవాలని వీరు డిమాండ్ చేస్తున్నారు. రేపు ప్రపంచ ఆదివాసీ దినోత్సవం సందర్భంగా ఈ బందును ఒక రోజు ముందుగా నిర్వహిస్తున్నట్లు తెలిపారు.

బంద్ ప్రభావం అల్లూరి సీతారామరాజు, పార్వతీపురం మన్యం, ఏలూరు జిల్లాల్లో ఎక్కువగా ఉంటుందని భావిస్తున్నారు. ఆర్టీసీ బస్సులు, ప్రైవేట్ వాహనాల రాకపోకలకు అంతరాయం ఏర్పడే అవకాశం ఉంది. గిరిజన ప్రాంతాల్లోని పాఠశాలలు, కళాశాలలకు సెలవు ప్రకటించే అవకాశం ఉంది.

అరకులోయ, బొర్రా గుహలు, పద్మాపురం గార్డెన్స్, చాపరాయి వంటి పర్యాటక ప్రాంతాల్లో సందర్శనలు, వాణిజ్య కార్యకలాపాలు నిలిచిపోవచ్చు. స్థానిక వ్యాపారులు తమ దుకాణాలు స్వచ్ఛందంగా మూసేయాలని జేఏసీ కోరింది.

ఈ బంద్ ద్వారా గిరిజన హక్కులు, చట్టాల పరిరక్షణ కోసం పోరాటాన్ని మరింత బలంగా ప్రదర్శిస్తారని నిర్వాహకులు తెలిపారు. ముఖ్యమంత్రి చంద్రబాబు నాయుడు ఆదివాసీ దినోత్సవం సందర్భంగా స్పష్టమైన ప్రకటన చేయాలని సంఘాలు డిమాండ్ చేస్తున్నాయి.