భామ్రాగడ్‌లో మావోయిస్టుల బ్యానర్లు, ఐదు రోజుల బంద్‌కు పిలుపు

మహారాష్ట్ర-ఛత్తీస్గడ్ సరిహద్దులోని భామ్రాగడ్ అటవీ ప్రాంతంలో మావోయిస్టుల పేరుతో బ్యానర్లు, పోస్టర్లు వెలిశాయి. వీటిలో నేటి నుంచి నెల 30 వరకు ఐదు రోజుల పాటు బంద్ పాటించాలని పిలుపు ఇస్తున్నారు.

పోస్టర్లలో కేంద్ర, రాష్ట్ర ప్రభుత్వాలు మావోయిస్టులకు జరిగిన నష్టానికి బాధ్యత వహించాలని పేర్కొన్నారు. అలాగే మావోయిస్టు సానుభూతి పరులు ఉన్న గ్రామాల్లో సభలు నిర్వహించాలని కూడా కోరారు. ఈ బ్యానర్లు కనిపించగానే భద్రతా బలగాలు అప్రమత్తమయ్యాయి.

మహారాష్ట్ర-ఛత్తీస్గడ్ సరిహద్దు వెంబడి పోలీసులు పెద్ద ఎత్తున కూంబింగ్ చేపట్టారు. అనుమానిత వ్యక్తులు, వాహనాలను తనిఖీ చేస్తున్నారు. తెలంగాణ సరిహద్దు ప్రాంతాల్లో కూడా పోలీసులు విస్తృతంగా చెకింగులు నిర్వహిస్తున్నారు.

ఇటీవల ఎన్కౌంటర్లలో మావోయిస్టు నేతలు మరణించడం, కొందరు లొంగిపోవడంతో వారు తిరిగి తమ ఉనికిని చాటేందుకు ఈ బ్యానర్లు ఏర్పాటు చేసి ఉండొచ్చని అనుమానిస్తున్నారు. అయితే ఇవి నిజమైన మావోయిస్టులవా లేక ఆకతాయిలు మావోయిస్టుల పేరుతో ఏర్పాటు చేశారా అనే కోణంలో పోలీసులు దర్యాప్తు కొనసాగిస్తున్నారు. మొత్తం పరిస్థితి అదుపులో ఉన్నట్లు అధికారులు తెలిపారు.