యువ కస్టమర్లను ఆకట్టుకోవడానికి మారుతీ సుజుకీ కొత్త బ్రెజా టర్బో ఎంజిన్‌తో విడుదల

మారుతీ సుజుకీ తన అత్యంత ప్రజాదరణ పొందిన బ్రెజా ఎస్‌యూవీని పూర్తిగా నూతన 1.0 లీటర్ టర్బో పెట్రోల్ ఎంజిన్‌తో లాంచ్ చేసింది. ఇది కేవలం ఫేస్‌లిఫ్ట్ కాదు, వాహనం గుండెల్లో మార్పు తెచ్చింది. ఈ డైరెక్ట్ ఇంజెక్షన్, హైటెక్ ఇంజిన్ 1.2 లీటర్ ఇంజిన్లతో సమానమైన అవుట్‌పుట్ ఇస్తుంది. నగర ట్రాఫిక్‌లో వేగంగా ఓవర్టేక్ చేయడం, హైవేలపై క్రూజింగ్ వంటి అవసరాలుండే యువ కస్టమర్లను టార్గెట్ చేసి ఈ టర్బో మోడల్‌ను రూపొందించారు. కేవలం మైలేజీ కోసమే కారు కొనే రోజులు పోయాయని, ఇప్పుడు డ్రైవింగ్ థ్రిల్, లైఫ్‌స్టైల్ అనుభూతి కూడా కస్టమర్ కోరుకుంటున్నారని మారుతీ సేల్స్ అండ్ మార్కెటింగ్ సీనియర్ ఆఫీసర్ పార్థో బెనర్జీ తెలిపారు.

బ్రెజాకు ప్రస్తుతం నెలకు దాదాపు 15 వేల యూనిట్ల స్థిరమైన విక్రయాలు ఉన్నాయి. తక్కువ GST రేటు కిందకు వచ్చే ఈ కొత్త వేరియంట్ ధర ఆకర్షణీయంగా ఉండడంతో, ఇప్పటికే ఉన్న బ్రెజా కస్టమర్లతోపాటు ఇతర బ్రాండ్ల నుంచి కొనుగోలుదారులను కూడా ఆకర్షిస్తుందని కంపెనీ భావిస్తోంది. ‘సరైన ఉత్పత్తి, సరైన ధర’ అనే తమ చైర్మన్ మంత్రాన్ని గుర్తుచేస్తూ, బెనర్జీ ఈ విధానంపై నమ్మకం వ్యక్తం చేశారు.

ఇటీవల కాలంలో సీఎన్‌జీ, ఎలక్ట్రిక్ వాహనాల వైపు మారుతీ చేస్తున్న అడుగుల నేపథ్యంలో, బ్రెజా టర్బో లాంచ్ పెట్రోల్ ఇంజిన్ విభాగంలో కంపెనీ నిబద్ధతను చాటుతోంది. డ్రైవింగ్ అనుభవంపై ఎలాంటి రాజీపడకుండా నడిచే స్మాల్ కార్ల విభాగాన్ని కూడా కంపెనీ పూర్తిగా విడిచిపెట్టలేదని ఆయన స్పష్టం చేశారు. మోటరైజేషన్ పెరగాలంటే చిన్న కార్లు ముఖ్యమని, భారతదేశం వంటి దేశంలో అందరూ 15 లక్షల రూపాయల కారు కొనలేరని బెనర్జీ అభిప్రాయపడ్డారు.