కోనసీమ జిల్లా ద్రాక్షారామంలో కూరగాయల మార్కెట్‌లో భారీ అగ్ని ప్రమాదం - 50కి పైగా దుకాణాలు దగ్ధం

అంబేద్కర్ కోనసీమ జిల్లా ద్రాక్షారామంలో అర్ధరాత్రి కూరగాయల మార్కెట్‌లో భారీ అగ్ని ప్రమాదం జరిగింది. ఈ ప్రమాదంలో సుమారు 50 నుంచి 55 వరకు కూరగాయలు, చికెన్ దుకాణాలు పూర్తిగా దగ్ధమయ్యాయని స్థానిక వ్యాపారులు తెలిపారు.

అగ్నిప్రమాదం జరిగిన వెంటనే ఫైర్ సిబ్బంది ఘటనాస్థలానికి చేరుకుని రెండు గంటలకు పైగా శ్రమించి మంటలను అదుపు చేశారు. మార్కెట్ లోపల దుకాణాలు సమూహంగా ఉండటంతో మంటలు వేగంగా వ్యాపించాయి. అర్ధరాత్రి ప్రమాదం జరగడంతో మార్కెట్‌లో ప్రజలెవరూ లేరు. దీంతో ఎలాంటి ప్రాణ నష్టం జరగలేదు.

ఈ ప్రమాదానికి కారణం షార్ట్ సర్క్యూట్, గ్యాస్ లీకేజీ లేదా కావాలని చేసిన ఘటన అన్న కోణాల్లో పోలీసులు దర్యాప్తు చేస్తున్నారు. స్థానిక MLA వాసు సుభాష్ ఘటనాస్థలాన్ని సందర్శించి, అధికారులతో మాట్లాడి విచారణ చేయాలని ఆదేశించారు.

చుట్టుపక్కల నివాసితులు భయాందోళన వ్యక్తం చేశారు. ఒకవేళ ఈ ప్రమాదం పగటిపూట జరిగివుంటే, మార్కెట్‌లో ఉన్న వ్యాపారులు, రైతులు, కొనుగోలుదారులతో భారీ ప్రాణ నష్టం సంభవించేదని స్థానికులు ఆందోళన వ్యక్తం చేస్తున్నారు. అధికారులు దర్యాప్తును కొనసాగిస్తున్నారు.