జడల రామలింగేశ్వర ఆలయం వద్ద భారీ అగ్ని ప్రమాదం; 20కి పైగా షాపులు, గ్రామ పంచాయతీ భవనం దగ్ధం

నల్గొండ జిల్లా నాటపల్లి మండలం చెరువుగట్టులోని జడల రామలింగేశ్వర స్వామి ఆలయం సమీపంలో రాత్రి భారీ అగ్ని ప్రమాదం జరిగింది. ఈ ప్రమాదంలో 20కి పైగా బొమ్మల షాపులు, తోపుడు బండ్లు పూర్తిగా కాలిపోయాయి. మంటలు పక్కనే ఉన్న గ్రామ పంచాయతీ భవనానికి వ్యాపించడంతో అందులోని కీలక రికార్డులు దగ్ధమయ్యాయి.

స్థానికుల కథనం ప్రకారం, షార్ట్ సర్క్యూట్ కారణంగా ఒక షాపులో మంటలు మొదలయ్యాయి. ఆ షాపులో గ్యాస్ సిలిండర్ పేలడంతో మంటలు వేగంగా చుట్టుపక్కల షాపులకు వ్యాపించాయి. షాపులన్నీ ఒకే వరుసలో ఉండటం, ఓపెన్ ఏరియా లేకపోవడం వల్ల మంటలు త్వరగా అంటుకున్నాయి. ఘటన సమయంలో అక్కడ ఎవరూ లేకపోవడంతో ప్రాణ నష్టం జరగలేదు.

సమాచారం అందిన వెంటనే మూడు ఫైర్ ఇంజన్లు సంఘటనా స్థలానికి చేరుకున్నాయి. అయితే రాత్రి కావడం వల్ల ఫైర్ ఇంజన్లు ఆలస్యంగా రావడంతో మంటలు విస్తృతంగా వ్యాపించాయని స్థానికులు తెలిపారు. మంటలను అదుపు చేసేందుకు తీవ్రంగా శ్రమించాల్సి వచ్చింది. షాపుల్లోని సామగ్రి, వస్తువులతో పాటు దాదాపు రెండు కోట్ల రూపాయల ఆస్తి నష్టం జరిగినట్లు షాపు యజమానులు చెబుతున్నారు.

ఈ ఆలయం తెలంగాణలో అతి పెద్ద ఆలయాల్లో ఒకటి. అమావాస్య, ఏకాదశి వంటి పర్వదినాల్లో లక్షలాది మంది భక్తులు ఇక్కడికి వస్తుంటారు. ప్రమాదం రాత్రి జరగడం వల్ల భక్తులకు ఎలాంటి హానీ జరగలేదు. షాపులకు సంబంధించిన ఎలక్ట్రిక్ సామగ్రి, బ్రాండెడ్ వస్తువులు వాడాలని, ఓపెన్ ఏరియాలో షాపులు ఏర్పాటు చేసుకోవాలని గతంలో అధికారులు హెచ్చరించినా వారు వినలేదని చెబుతున్నారు. నాటపల్లి పోలీసులు ఘటనా స్థలాన్ని సందర్శించి, పరిస్థితిని సమీక్షించారు. ప్రస్తుతం మంటలు పూర్తిగా అదుపులోకి వచ్చాయి.