ప్రకాశం బ్యారేజీకి భారీ వరద ప్రవాహం.. 50 గేట్లు ఎత్తివేత

ప్రకాశం బ్యారేజీకి భారీ వరద ప్రవాహం చేరింది. గత రెండు రోజులుగా ఎగువ ప్రాంతాల్లో కురిసిన భారీ వర్షాల వల్ల వరద పెరిగింది. ఎగువ నుంచి 44,050 క్యూసెక్కుల నీరు వచ్చింది. దీంతో బ్యారేజీ వద్ద ప్రవాహ స్థాయి 12 అడుగులకు చేరింది.

అధికారులు 70 గేట్లలో 50 గేట్లు ఎత్తారు. దిగువ ప్రాంతాలకు 36,250 క్యూసెక్కుల నీటిని విడుదల చేస్తున్నారు. ఈ ఖరీఫ్ సీజన్లో ఇంత స్థాయిలో వరద నీరు రావడం ఇదే మొదటిసారి.

ఈ నీటిని వివిధ పంట కాలువలకు కూడా విడుదల చేస్తున్నారు. సాగుకు నీరు అందడంతో రైతులు సంతోషం వ్యక్తం చేశారు. కృష్ణా డెల్టా ఆయకట్టుకు ఈసారి నీరు సమృద్ధిగా అందుతుందని వారు భావిస్తున్నారు.

వరద ప్రవాహం మరింత పెరిగితే మిగిలిన 20 గేట్లు కూడా ఎత్తుతారు. అందుకు అధికారులు సిద్ధంగా ఉన్నారు.