తిరుమలలో భారీ భక్తుల రద్దీ: సర్వదర్శనానికి 24 గంటల సమయం

తిరుమల శ్రీవారి దర్శనానికి భారీ సంఖ్యలో భక్తులు వస్తున్నారు. సర్వదర్శనం కోసం దాదాపు 24 గంటల సమయం వేచి ఉండాల్సి వస్తోంది. క్యూలైన్లలో భక్తులు 15 నుంచి 20 గంటల పాటు ఎదురుచూస్తున్నారు.

నిన్న శనివారం ఒక్క రోజే 92,017 మంది భక్తులు శ్రీవారిని దర్శించుకున్నారు. 47,948 మంది తలనీలాలు సమర్పించారు. హుండీ ద్వారా రూ.3.93 కోట్ల ఆదాయం వచ్చింది. 4.63 లక్షల లడ్డూలు విక్రయించినట్లు టీటీడీ వెల్లడించింది.

కాలిబాట మార్గంలో కూడా పెద్ద సంఖ్యలో భక్తులు తరలివస్తున్నారు. అటవీ ప్రాంతంలో చిరుతల సంచారం నేపథ్యంలో భక్తులు అప్రమత్తంగా ఉండాలని టీటీడీ విజిలెన్స్ అధికారులు సూచించారు. గుంపులుగా వెళ్లాలని, చిన్నపిల్లలు, మహిళలు జాగ్రత్తలు తీసుకోవాలని సూచించారు. కాలిబాటల్లో ఫారెస్ట్ అధికారులను పెద్ద సంఖ్యలో మోహరించారు.

ఆదివారం ఉదయం సుప్రభాత సేవ, ఇతర కైంకర్యాల అనంతరం సామాన్య భక్తులకు దర్శనం ప్రారంభమైంది. విఐపీ ప్రోటోకాల్ కింద ప్రముఖులకు కూడా దర్శన అవకాశం కల్పించారు. వేసవి తీవ్రత దృష్ట్యా భక్తులకు మజ్జిగ, అన్నప్రసాదాలు అందజేస్తున్నారు. వడదెబ్బ తగలకుండా టీటీడీ చర్యలు తీసుకుంది.

వారాంతం కావడంతో రద్దీ పెరిగిందని టీటీడీ అధికారులు గుర్తించారు. ఈ రద్దీ మరో రెండు రోజుల పాటు కొనసాగే అవకాశం ఉంది.