ఫ్రాన్స్-స్పెయిన్ సరిహద్దు అటవీ ప్రాంతంలో భారీ కార్చిచ్చు; 2.5 లక్షల మంది తరలింపు

ఫ్రాన్స్-స్పెయిన్ సరిహద్దు అటవీ ప్రాంతంలో నిన్న సాయంత్రం భారీ అడవి మంటలు చెలరేగాయి. మంటలు వేగంగా వ్యాపించడంతో గాలి నాణ్యత క్షీణించింది. అధికారులు అప్రమత్తమై 2.5 లక్షల మందిని సురక్షిత ప్రాంతాలకు తరలించారు.

మంటలను అదుపు చేయడానికి వందలాది అగ్నిమాపక సిబ్బంది శ్రమిస్తున్నారు. ఫ్రాన్స్ సైన్యం హెలికాప్టర్ల ద్వారా వేల లీటర్ల నీటిని కుమ్మరిస్తోంది. ఫ్రాన్స్ అధ్యక్షుడు మేక్రాన్ ఐరోపా సమాఖ్య సాయం కోరారు.

స్పెయిన్ అత్యవసర పరిస్థితి ప్రకటించింది. ఓ ట్రాక్టర్ డ్రైవర్ ఆ ప్రాంతంలో అంటించిన నిప్పు నుంచే ఈ మంటలు ప్రారంభమయ్యాయని స్పానిష్ పోలీసులు తెలిపారు.

ప్రస్తుతం మంటల వ్యాప్తి కొనసాగుతోంది. రెండు దేశాలూ సంయుక్తంగా సహాయక చర్యలు చేపడుతున్నాయి.