ఆన్లైన్ మందుల విక్రయాలకు వ్యతిరేకంగా మే 20న దేశవ్యాప్తంగా మెడికల్ షాప్‌ల బందు

ఆన్లైన్ మందుల విక్రయాలను నిలిపివేయాలని డిమాండ్ చేస్తూ దేశవ్యాప్తంగా మే 20న మెడికల్ షాప్‌లు బందు పాటించబోతున్నాయి. ఆల్ ఇండియా ఆర్గనైజేషన్ ఆఫ్ కెమిస్ట్ అండ్ డ్రగ్గిస్ట్ (AIOCD) ఈ బందుకు పిలుపునిచ్చింది.

ఈ బందుకు రెండు ప్రధాన కారణాలు ఉన్నాయి. 2018లో ఆన్లైన్ మందుల అమ్మకాల కోసం తీసుకొచ్చిన నిబంధనలు, కరోనా సమయంలో తాత్కాలికంగా ఏర్పాటైన WhatsApp లేదా email ద్వారా ప్రిస్క్రిప్షన్ పంపి హోమ్ డెలివరీ చేసే నియమం — ఈ రెండింటినీ రద్దు చేయాలని AIOCD కోరుతోంది.

ప్రభుత్వం నిర్ణయించిన మార్జిన్ ప్రకారం రిటైల్ మెడికల్ షాప్‌లకు 20% మార్జిన్ మాత్రమే అనుమతి ఉంది. అయితే ఆన్లైన్ ఫార్మసీలు 30% నుండి 50% వరకు డిస్కౌంట్ ఇస్తున్నాయని కెమిస్ట్ అసోసియేషన్ ఆరోపిస్తోంది. Schedule H, Schedule H1, Schedule X వంటి నిర్దేశిత మందులు ప్రిస్క్రిప్షన్ లేకుండా ఆన్లైన్‌లో విక్రయిస్తున్నారని, యాంటీబయోటిక్స్ నియమాలు పాటించడం లేదని AIOCD ఆరోపిస్తోంది.

హైదరాబాద్ కెమిస్ట్ అండ్ డ్రగ్గిస్ట్ అసోసియేషన్ అధ్యక్షుడు శ్రీధర్ మాట్లాడుతూ, అత్యవసర మందుల విషయంలో సేవలు అందిస్తామని తెలిపారు. దేశవ్యాప్తంగా 12 లక్షల మెడికల్ షాప్‌లు, రాష్ట్రంలో 45,000 స్టోర్లు ఈ బందులో పాల్గొంటున్నాయని ఆయన పేర్కొన్నారు.

ప్రజలకు ఇబ్బందులు కలగకుండా ప్రత్యామ్నాయ ఏర్పాట్లు చేస్తున్నట్లు అధికారులు తెలిపారు. ప్రభుత్వం నిర్ణయం తీసుకునేంత వరకు ఈ ఆందోళన కొనసాగుతుందని AIOCD స్పష్టం చేసింది.