వైద్య విద్యార్థి ప్రియాంక పరిస్థితి విషమం; ఆప్నియా టెస్ట్ వాయిదా

వైద్య విద్యార్థి ప్రియాంక ఆరోగ్య పరిస్థితి అత్యంత విషమంగా ఉంది. సికింద్రాబాద్‌లోని కిమ్స్ ఆసుపత్రిలో చికిత్స పొందుతున్న ఆమెకు మూడు రోజులుగా చికిత్స కొనసాగుతున్నప్పటికీ ఎలాంటి మెరుగుదల లేదు.

వైద్యులు ఆమెకు ఆప్నియా టెస్ట్ చేయాలనుకున్నారు. ఈ టెస్ట్ ద్వారా మెదడు కణజాలం పనితీరు, సర్వైవల్ రేట్ అంచనా వేస్తారు. అయితే ప్రియాంక శరీరంలో సోడియం స్థాయిలు, ఇతర ఆర్గానిక్ సమస్యల కారణంగా టెస్ట్ చేసేందుకు వీలుపడలేదని వైద్యులు తెలిపారు. దీంతో ప్రస్తుతానికి టెస్ట్ నిలిపి వేశారు.

రాజమండ్రిలో జరిగిన ఒక ఘటనలో ప్రియాంక గాయపడగా, అక్కడే తొలి చికిత్స అందించారు. ఆ సమయంలోనే ఆమె బ్రెయిన్ డెడ్ అని వైద్యులు నిర్ధారించారు. మెరుగైన చికిత్స కోసం కుటుంబ సభ్యులు కిమ్స్‌కు తీసుకువచ్చారు.

ప్రియాంక కుటుంబం ఇంకా ఆశ వీడలేదు. తమ కూతురు కోలుకుంటుందని నమ్ముతున్నామని, ఈ ఘటనలో న్యాయం జరగాలని వారు అంటున్నారు. ప్రస్తుతం వైద్యులు కుటుంబ సభ్యులతో పరిస్థితిని వివరిస్తున్నారు.