మెడికో ప్రియాంకపై దాడి: హత్యాయత్నం కేసు నమోదు, ఇద్దరి అరెస్ట్

మెడికో విద్యార్థిని ప్రియాంకపై కారులో ఢీకొట్టిన ఘటనలో పోలీసులు హత్యాయత్నం కేసు నమోదు చేశారు. ఇద్దరు నిందితులను అరెస్ట్ చేసి కోర్టులో హాజరుపరిచారు. కోర్టు వారికి రిమాండ్ విధించింది.

SP కిషోర్ ఈ వివరాలు వెల్లడించారు. ప్రియాంక, ఆమె స్నేహితుడు ఉమేష్ స్కూటీపై సినిమా చూసి తిరిగి వస్తుండగా, నిందితులు కారులో కావాలని మూడుసార్లు ఢీకొట్టారని తెలిపారు. ఈ ఘటనకు ముందు నిందితులు మాల్‌లో సెక్యూరిటీతో గొడవపడి, పట్టుబడతామనే భయంతో తప్పించుకునే ప్రయత్నంలో ఈ దాడి చేశారని చెప్పారు.

మొదట ప్రమాదంగా భావించిన పోలీసులు, సీసీటీవీ ఫుటేజీ పరిశీలించిన తర్వాత పరిస్థితిని గమనించి కేసును హత్యాయత్నం సెక్షన్‌కు మార్చారు. గతంలో నాలుగో తేదీన ఎఫ్ఐఆర్ నమోదు చేసి, అదే రోజు నిందితులను అరెస్టు చేశారు. ఆరో తేదీన కోర్టు ముందు ప్రవేశపెట్టి రిమాండ్ పొందారు.

ఇప్పుడు నిందితులను పోలీస్ కస్టడీకి ఇవ్వాలని కోరుతున్నామని SP తెలిపారు. కేసును మరింత బలపరచేందుకు అదనపు ఆధారాలు సేకరిస్తున్నారు. నిందితులకు ఎలాంటి గతంలో నేర చరిత్ర ఉందో పరిశీలిస్తున్నామని, కన్విక్షన్ కోసం ప్రత్యేక పబ్లిక్ ప్రాసిక్యూటర్ నియమిస్తామని SP వివరించారు.