మెడికో ప్రియాంక హత్యపై తండ్రి ఆవేదన: ‘ప్రభుత్వం స్పందించలేదు’

మెడికల్ విద్యార్థిని ప్రియాంక హత్య కేసులో ఆమె తండ్రి మీడియా ముందు ఆవేదన వ్యక్తం చేశారు. తన కుమార్తె చనిపోయిన తర్వాత ప్రభుత్వం నుంచి ఎలాంటి స్పందన రాలేదని ఆయన ఆరోపించారు. ‘ఒక్క రూపాయి సాయం కూడా ఇవ్వలేదు. ఫోన్ కాల్ కూడా రాలేదు’ అని ఆయన అన్నారు.

ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కల్యాణ్, విద్యాశాఖ మంత్రి నారా లోకేశ్, హోం మంత్రిని ఉద్దేశించి ఆయన ప్రశ్నించారు. ‘మీకు కూతుళ్లు, చెల్లెళ్లు లేరా?’ అని అడిగారు. ప్రియాంక చదువులో మెరుగ్గా ఉండేదని, డాక్టర్ కావాలనే కలను నెరవేర్చుకునే దశలో హత్యకు గురైందని తెలిపారు.

ఈ ఘటనపై పెద్ద ఎత్తున వార్తలు వచ్చినప్పటికీ ప్రభుత్వం పట్టించుకోలేదని ఆయన విమర్శించారు. ప్రభుత్వం స్పందించకపోవడం తనకు తీరని బాధ కలిగించిందని, ఏడ్చి ఏడ్చి కళ్లలో నీళ్లు కూడా ఇంకిపోయాయని తెలిపారు. ఈ విషయంపై ప్రభుత్వం నుంచి ఇప్పటివరకు స్పందన లేదు.