మేడిపల్లిలో 8 నెలల శిశువు కిడ్నాప్: 3 గంటల్లోనే పోలీసులు రెస్క్యూ

మేడిపల్లిలో 8 నెలల శిశువు కిడ్నాప్ కేసును పోలీసులు మూడు గంటల్లోనే ఛేదించారు. నిందితురాలిని పట్టుకుని చిన్నారిని తల్లిదండ్రులకు సురక్షితంగా అప్పగించారు.

బోడుప్పల్ ఎన్ఐఎన్ కాలనీలో నివాసముంటున్న కొత్త శివరాం దంపతుల కుమారుడు వైష్ణవ్ రుద్రాంష్ ను, అదే అపార్ట్‌మెంట్‌లో వాచ్‌మెన్ గా పనిచేస్తున్న నల్ల దుర్గా భవాని బుధవారం మధ్యాహ్నం ఎత్తుకెళ్లింది. చిన్నారిని కిందకు తీసుకెళ్తానని చెప్పి బయటకు తీసుకువెళ్లిన ఆమె, ఆటోలో కర్మాన్‌ఘాట్‌లోని తన ఇంటికి వెళ్లిపోయింది.

శిశువు కనిపించకపోవడంతో తల్లిదండ్రులు మేడిపల్లి పోలీస్ స్టేషన్‌లో ఫిర్యాదు చేశారు. పోలీస్ కమిషనర్ ఆదేశాలతో ఆరు ప్రత్యేక బృందాలు ఏర్పాటు చేశారు. సీసీటీవీ ఫుటేజ్ ఆధారంగా నిందితురాలిని గుర్తించారు.

దేవరకొండలో నిందితురాలి భర్త, తల్లిని విచారించి, ఆమె తాజా చిరునామా కర్మాన్‌ఘాట్ అని తెలుసుకున్నారు. రెండు గంటల్లో పోలీసులు కర్మాన్‌ఘాట్ చేరుకుని, ఇల్లు ఖాళీగా ఉండటంతో చుట్టుపక్కల గాలించారు. మూడో గంటలోపు నిందితురాలిని పట్టుకుని చిన్నారిని రక్షించారు.

ప్రస్తుతం నిందితురాలిని అరెస్టు చేసి పోలీసులు విచారిస్తున్నారు. ఈ ఘటనపై కేసు నమోదు చేసి దర్యాప్తు కొనసాగిస్తున్నారు.