మెగా DSC-2025 స్పోర్ట్స్ కోటా ఉపాధ్యాయ ఎంపికలో పారదర్శకత ఉందని ఎంపికైన ఉపాధ్యాయుల వివరణ

ఆంధ్రప్రదేశ్‌లో మెగా DSC-2025 స్పోర్ట్స్ కోటా ద్వారా ఎంపికైన ఉపాధ్యాయులు తమ ఎంపిక పారదర్శకంగా జరిగిందని స్పష్టం చేశారు. కొందరు వీడియోలు విడుదల చేసి, తమ క్రీడా అర్హతలను, మెరిట్ ఆధారంగా ఉద్యోగం లభించిందని తెలిపారు.

విశాఖపట్నంలోని ZPHS చింతపల్లి పాఠశాలలో స్కూల్ అసిస్టెంట్ ఫిజికల్ ఎడ్యుకేషన్ టీచర్‌గా పనిచేస్తున్న సతీష్ కుమార్ మాట్లాడుతూ, ట్రయథ్లాన్ (స్విమ్మింగ్, సైక్లింగ్, రన్నింగ్) క్రీడాకారుడిగా తాను స్పోర్ట్స్ కోటాలో ఉద్యోగం సాధించినట్లు తెలిపారు. ఎంపిక పూర్తిగా పారదర్శకంగా జరిగిందని, ఎలాంటి అక్రమాలు లేవని అన్నారు.

సత్యసాయి జిల్లాకు చెందిన షార్ట్ బాల్ క్రీడాకారుడు ఏం. శివకుమార్ మాట్లాడుతూ, దాదాపు 30 జాతీయ స్థాయి పోటీల్లో పాల్గొన్నట్లు తెలిపారు. ప్రస్తుత ప్రభుత్వం స్పోర్ట్స్ కోటాను 2 శాతం నుంచి 3 శాతానికి పెంచడం వల్ల తనకు ఉద్యోగం లభించిందని వివరించారు.

కర్నూలు (కోమల మండలం) కృష్ణంపల్లి MPUPS పాఠశాలలో స్కూల్ అసిస్టెంట్ బయాలజీ టీచర్‌గా పనిచేస్తున్న వాలీబాల్ క్రీడాకారిణి కీతేజ మాట్లాడుతూ, నోటిఫికేషన్‌పై వచ్చే పుకార్లు నిజం కాదని, మెరిట్ ప్రాతిపదికనే తనకు ఉద్యోగం వచ్చిందని చెప్పారు. డబ్బులు ఎవరికీ ఇవ్వలేదని స్పష్టం చేశారు.

స్పోర్ట్స్ కోటాపై తప్పుడు ప్రచారం చేయవద్దని ఎంపికైన ఉపాధ్యాయులు విజ్ఞప్తి చేశారు. మెరిట్, పారదర్శకత ఆధారంగానే ఎంపికలు జరిగాయని పునరుద్ఘాటించారు.