హనీమూన్ హత్య కేసు: సోనమ్ రఘువంశీకి బెయిల్ రద్దు చేయాలని మేఘాలయ సర్కార్ సుప్రీంకు

హనీమూన్ హత్య కేసులో నిందితురాలు సోనమ్ రఘువంశీకి మంజూరైన బెయిల్ను రద్దు చేయాలని మేఘాలయ ప్రభుత్వం సుప్రీంకోర్టును ఆశ్రయించింది. ఈ కేసులో బెయిల్ ఇవ్వడాన్ని సవాల్ చేస్తూ దాఖలైన పిటిషన్‌పై సుప్రీంకోర్టు నేడు విచారణ జరపనుంది.

భర్త రాజా రఘువంశీ హత్య కేసులో సోనమ్‌కు ఇంతకుముందే రెండుసార్లు బెయిల్ నిరాకరించిన విషయం తెలిసిందే. అయితే, ఇటీవల ఆమెకు బెయిల్ మంజూరైన నేపథ్యంలో అరెస్ట్ వారెంట్‌లో తప్పుడు BNS సెక్షన్లు పేర్కొనడం, అరెస్టుకు సంబంధించిన కారణాలను సరిగా సూచించకపోవడం వంటి ప్రొసీజరల్ లోపాలను హైకోర్టు ప్రస్తావించింది. పోలీసులు విచారణలో తగిన అప్లికేషన్ ఆఫ్ మైండ్ చూపలేదని, రాష్ట్ర ప్రభుత్వం వాదనలు హాస్యాస్పదంగా ఉన్నాయని హైకోర్టు వ్యాఖ్యానించింది.

అయితే, ఈ బెయిల్ ప్రొసీజరల్ లోపం కారణంగా మాత్రమే ఇవ్వడం జరిగిందని, నిందితురాలు ముందస్తు ప్రణాళికతో హత్య చేసి ఆచూకీ దాచిందని, బెయిల్ పొందిన వెంటనే పరారయ్యే అవకాశం ఉందని మేఘాలయ సర్కార్ సుప్రీంకోర్టుకు నివేదించింది. హైకోర్టు తీర్పులో ఉన్న లోపాలను ఎత్తిచూపుతూ బెయిల్ రద్దు చేయాలని కోరింది.

గతంలో సోనమ్‌కు రెండుసార్లు బెయిల్ నిరాకరించిన నేపథ్యంలో, ఈ బెయిల్ ద్వారా న్యాయం జరగకపోవచ్చనే ఆందోళన రాష్ట్ర ప్రభుత్వాన్ని సుప్రీంకోర్టుకు వెళ్లేలా చేసింది. ప్రస్తుతం కేసు సుప్రీంకోర్టు విచారణకు రాగా, నేటి విచారణలో కీలక పరిణామాలు చోటుచేసుకునే అవకాశం ఉంది.