విశాఖలో తెల్లవారుజామున స్వల్ప భూకంపం; తీవ్రత 4.5

విశాఖపట్నంలో మంగళవారం తెల్లవారుజామున 5.08 గంటలకు స్వల్ప భూకంపం సంభవించింది. బంగాళాఖాతంలో విశాఖ తీరానికి కొన్ని నాటికల్ మైళ్ల దూరంలో రిక్టర్ స్కేల్‌పై 4.5 తీవ్రతతో ఈ ప్రకంపనలు నమోదయ్యాయని అధికారులు తెలిపారు.

సాగర్ నగర్, తాటిచెట్లపాలెం, సీతమ్మధార, మాధవధార, పెదవాల్తేరు, గాజువాక, ఆరిలోవ తదితర ప్రాంతాల్లో భూమి కొద్దిసేపు కంపించింది. ఈ కంపనలతో నిద్రలేచిన స్థానికులు భయంతో ఇళ్ల నుంచి బయటకు పరుగులు తీశారు. ఎక్కడా ప్రాణనష్టం, ఆస్తి నష్టం జరగలేదు.

భూగర్భ జలాలు అడుగంటడం, భూపొరల్లో మార్పులు ఇటీవల కాలంలో పెరగడం వల్ల ఈ భూకంపం సంభవించి ఉండొచ్చని కొందరు స్థానికులు అనుమానం వ్యక్తం చేశారు. నిపుణులు మాత్రం దీన్ని సముద్ర గర్భంలో సహజ కంపనంగా పేర్కొంటున్నారు. మరోసారి భూకంపం వచ్చే అవకాశం ఉన్నందున ప్రజలు అప్రమత్తంగా ఉండాలని అధికారులు సూచించారు.