ఖమ్మం విజయ డెయిరీలో పాల ప్యాకింగ్ నిలిపివేత; హైదరాబాద్ నుంచి సరఫరా

ఖమ్మం పట్టణంలోని విజయ డెయిరీలో పాల ప్యాకింగ్ ఈ నెల 1 నుంచి నిలిపివేశారు. ఈ విషయంలో ఎలాంటి ముందస్తు సమాచారం ఇవ్వలేదు. ప్రస్తుతం హైదరాబాద్ లోని మెగా డెయిరీ నుంచి పాలను దిగుమతి చేసుకుంటున్నారు.

ఖమ్మం, కొత్తగూడం జిల్లాల్లోని హాస్టళ్లకు రోజూ 7,000 లీటర్ల పాలు సరఫరా చేయాల్సి ఉంది. స్థానికంగా 4,000 లీటర్లు మాత్రమే సేకరణ జరుగుతోంది. మిగిలిన 3,000 లీటర్ల కొరత తీర్చేందుకు జనగామ మిల్క్ షెడ్ నుంచి పాలు తెచ్చినా నాణ్యత సమస్యలు తలెత్తాయి. దీంతో ప్రస్తుతం హైదరాబాద్ నుంచి ప్రైవేట్ డిస్ట్రిబ్యూటర్ల ద్వారా కమిషన్ ప్రాతిపదికన పాలు తెప్పించి సరఫరా చేస్తున్నారు.

అధికారులు మాట్లాడుతూ, ప్రస్తుత లీన్ సీజన్‌లో ఆవులు గర్భధారణ దశలో ఉండడంతో పాల సేకరణ బాగా తగ్గిందని వివరించారు. ప్యాకింగ్ యంత్రాలను సర్వీసింగ్, రిపేర్ చేయించాల్సిన అవసరం ఉన్నందున తాత్కాలికంగా ప్యాకింగ్ నిలిపివేశామని చెప్పారు. సెప్టెంబర్ నుంచి పాల సేకరణ పెరిగే అవకాశం ఉండడంతో మళ్లీ ప్యాకింగ్ పునఃప్రారంభిస్తామని భరోసా ఇచ్చారు.

రాష్ట్ర వ్యవసాయ శాఖ మంత్రి తుమ్మల నాగేశ్వరరావు ఇటీవల ఖమ్మం డెయిరీ ఆధునీకరణకు కోట్ల రూపాయల నిధులు మంజూరు చేశారు. రెండేళ్లుగా ప్రారంభం కాకుండా ఆగిపోయిన డెయిరీ దుకాణాల సముదాయాన్ని ఆయన ప్రారంభించారు. డ్రైనేజీ, ప్రహరీ నిర్మాణానికి కూడా నిధులు కేటాయించారు.

1973లో 10 ఎకరాల విస్తీర్ణంలో ఖమ్మం నడిబొడ్డున ఈ డెయిరీ ఏర్పాటైంది. ప్రస్తుతం సేకరించిన పాలను చిల్ చేసి ట్యాంకర్ల ద్వారా హైదరాబాద్ లోని ప్రధాన డెయిరీకి తరలిస్తున్నారు. ప్యాకింగ్ నిలిపివేత తాత్కాలికమేనని అధికారులు భరోసా ఇస్తున్నప్పటికీ, కార్మికుల భవిష్యత్పై స్పష్టత రావాల్సి ఉంది.