అమరావతిలో వరద ముప్పు నివారణకు మంత్రి నారాయణ కొండవీటివాగు, పాలవాగు ప్రాంతాలను పరిశీలించి అధికారులకు ఆదేశాలు జారీ చేశారు

వర్షాకాలం ముందస్తు చర్యగా మంత్రి నారాయణ అమరావతిలోని కొండవీటివాగు, పాలవాగు ప్రాంతాలను క్షేత్రస్థాయిలో పరిశీలించారు. వరద ముప్పు తగ్గించేందుకు నిర్మాణ పనుల వేగం, పూడిక తొలగింపుపై కీలక ఆదేశాలు జారీ చేశారు.

ఈ సందర్భంగా ఆయన వాగుల ప్రవాహ మార్గాలను స్వయంగా తనికీ చేశారు. బ్రిడ్జిల కింద నీటి ప్రవాహానికి అడ్డంకిగా ఉన్న మట్టి, పూడికను వెంటనే తొలగించాలని అధికారులను ఆదేశించారు. ప్రస్తుతం పాలవాగు, కొండవీటివాగుపై 69 బ్రిడ్జిలు నిర్మాణంలో ఉన్నాయి.

గతంలో వెస్టర్న్ బైపాస్ కింద మట్టి పేరుకుపోయి నీరు వెనక్కి ప్రవహించిన ఘటనలను గుర్తు చేస్తూ, అలాంటి పరిస్థితి మళ్లీ రాకుండా ఆయా ప్రాంతాల్లో మట్టి తొలగించామని మంత్రి తెలిపారు. బ్రిడ్జ్ నిర్మాణం జరుగుతున్న చోట నీటి ప్రవాహాన్ని దారి మళ్లించేందుకు అధికారులు చర్యలు తీసుకుంటున్నారని చెప్పారు.

ఈ వర్షాకాలం ముగిసే నాటికి, వచ్చే ఏడాది వర్షాకాలానికి ముందు 69 బ్రిడ్జిల నిర్మాణం పూర్తి చేస్తామని, అన్ని వెంట్లు క్లియర్ చేసి నీరు అడ్డంకి లేకుండా ప్రవహించేలా చూస్తామని మంత్రి స్పష్టం చేశారు.