శ్రీ సత్యసాయి జిల్లాలో ప్రతిభావంతులైన విద్యార్థులకు నగదు ప్రోత్సాహకాలు అందించిన మంత్రి సవిత

శ్రీ సత్యసాయి జిల్లా పెనుకొండలోని క్యాంప్ కార్యాలయంలో మంత్రి సవిత బుధవారం ప్రతిభా పురస్కారాలు అందజేశారు. రాయలసీమకు చెందిన కురుబ సామాజిక వర్గానికి చెందిన విద్యార్థులకు ఎస్‌ఆర్‌ఆర్ చారిటబుల్ ట్రస్ట్ ద్వారా ఈ నగదు ప్రోత్సాహకాలు అందించారు.

10వ తరగతిలో 580 కి పైగా మార్కులు సాధించిన 26 మంది విద్యార్థులకు ఒక్కొక్కరికి ₹25,000 చొప్పున, ఇంటర్‌లో 950 కి పైగా మార్కులు తెచ్చుకున్న 59 మందికి ఒక్కొక్కరికి ₹50,000 చొప్పున నగదు అందజేశారు. మొత్తం ₹36 లక్షలు ప్రోత్సాహకాలుగా పంపిణీ చేశారు.

ఈ సందర్భంగా మంత్రి సవిత మాట్లాడుతూ, విద్యార్థులు ఉన్నత లక్ష్యాలను నిర్దేశించుకుని ముందుకు సాగాలన్నారు. విద్యపై దృష్టి పెట్టి ఏదైనా సాధించవచ్చని చెప్పారు. ఇంజనీరింగ్ లేదా సివిల్ సర్వీసెస్ వంటి కెరీర్లను ఎంచుకునే విద్యార్థులకు ట్రస్ట్ తరఫున ల్యాప్‌టాప్‌లు అందించే ఏర్పాటు చేస్తామని ప్రకటించారు.

ఈ కార్యక్రమం ద్వారా తన తండ్రి పేరు మీద పేద విద్యార్థులను ప్రోత్సహిస్తున్నట్లు ఆమె తెలిపారు. విద్యతో పాటు అన్ని రంగాల్లో కురుబ సామాజిక వర్గం విద్యార్థులు రాణించాలనేది తమ లక్ష్యమని అన్నారు.