బోరబండలో మైనర్ నడిపిన కారు ఏడు బైకులను ఢీకొట్టడంతో ఒకరు మృతి

హైదరాబాద్‌లోని బోరబండ ప్రాంతంలో మైనర్ బాలుడు నడుపుతున్న కారు ఏడు ద్విచక్ర వాహనాలను ఢీకొట్టింది. ఈ ప్రమాదంలో ఒక వ్యక్తి మరణించగా, మరొకరు తీవ్రంగా గాయపడ్డారు.

రెంటల్ కారును నవాజ్ ఖాన్ అనే వ్యక్తి తీసుకోగా, ఆ కారును మైనర్ బాలుడు నడుపుతున్నట్లు పోలీసులు తెలిపారు. కార్మిక్ నగర్ వద్ద కారు వేగంగా దూసుకెళ్లి ముందు వెళ్తున్న బైకులతో పాటు ఎదురుగా వచ్చిన వాహనాలను కూడా ఢీకొట్టింది. మొత్తం ఏడు బైకులను ఢీకొట్టినట్లు స్థానికులు చెప్పారు.

ఈ ఘటనలో రాజ్కుమార్, ప్రభాకర్ అనే ఇద్దరు అన్నదమ్ములు బైక్ పై వెళ్తుండగా, వారి బైకును వెనక నుంచి కారు ఢీకొట్టింది. ప్రమాదంలో రాజ్కుమార్ పక్కటెముకలు విరిగి మృతి చెందారు. ప్రభాకర్ పరిస్థితి విషమంగా ఉండటంతో చికిత్స నిర్వహిస్తున్నారు.

ప్రమాదం జరిగిన వెంటనే కారు నడుపుతున్న మైనర్ అక్కడి నుంచి పారిపోగా, పోలీసులు అతన్ని అదుపులోకి తీసుకున్నారు. మైనర్లు వాహనాలు నడపడం ప్రమాదకరమని, కఠిన చర్యలు తీసుకుంటామని పోలీసులు హెచ్చరించారు. మధురానగర్ పోలీసులు కేసు నమోదు చేసి దర్యాప్తు చేస్తున్నారు.