మిర్యాలగూడ: ఆస్తి వివాదంలో కొడుకుల వేధింపులతో వృద్ధ దంపతుల కారుణ్య మరణం అభ్యర్థన

నల్గొండ జిల్లా మిర్యాలగూడ మండలం శెట్టిపాలెంకు చెందిన గగ్గనపల్లి బుచ్చిరెడ్డి (వీల్‌చైర్‌కు పరిమితమైన వృద్ధుడు), అనసూయమ్మ దంపతులు కారుణ్య మరణానికి అనుమతి కోరుతూ స్థానిక ఆర్‌డీఓ రమణారెడ్డికి వినతిపత్రం ఇచ్చారు. తమ కొడుకు, కోడలి నుంచి ఆస్తి కోసం తీవ్ర వేధింపులు, శారీరక దాడి ఎదురవుతున్నాయని వారు ఆరోపించారు.

బుచ్చిరెడ్డి, అనసూయమ్మలకు ఇద్దరు కొడుకులు. భూమిని సమానంగా పంచిన తర్వాత, తమ వృద్ధాప్యం, మందుల ఖర్చుల కోసం మూడు ఎకరాలు తమ వద్దే ఉంచుకున్నారు. అనారోగ్యం కారణంగా బుచ్చిరెడ్డి కాలు కోల్పోయి వీల్‌చైర్‌కు పరిమితమయ్యారు. ఆ సమయంలో మనవడు సహాయం చేయడంతో ఆ భూమిని మనవడి పేరిట రిజిస్ట్రేషన్ చేశారని కుటుంబ వర్గాలు చెబుతున్నాయి.

దీంతో పెద్ద కొడుకు, కోడలు తమకు వాటా ఇవ్వాలని ఒత్తిడి తెచ్చారు. మాట వినకపోతే చంపుతామని బెదిరించడంతో పాటు, కోడలు బుచ్చిరెడ్డిపై భౌతిక దాడికి పాల్పడినట్లు దంపతులు పోలీసులకు ఫిర్యాదు చేశారు. ఈ మేరకు పోలీస్ కేసు నమోదైంది. అయినా వేధింపులు ఆగలేదని, ట్రాక్టర్‌తో తొక్కించి పీనుగుల్ని చేస్తామన్న బెదిరింపులు ఎదురైనట్లు వారు ఆవేదన వ్యక్తం చేశారు.

స్థానిక పోలీసులు పట్టించుకోకపోవడంతో మానసికంగా కుంగిపోయిన దంపతులు, “మమ్మల్ని చంపకముందే మాకు చావడానికి అనుమతి ఇవ్వండి” అంటూ ఆర్‌డీఓను ఆశ్రయించారు. ఆర్‌డీఓ విచారణ జరిపి కఠిన చర్యలు తీసుకుంటామని హామీ ఇచ్చారు. ఈ ఘటనపై స్థానికులు ఆగ్రహం వ్యక్తం చేస్తూ నిందితులపై చర్యలు తీసుకోవాలని కోరారు.