ఎంజేపీటీ బీసీ వెల్ఫేర్ జూనియర్ కాలేజీ విద్యార్థులకు నీట్‌లో మంచి ర్యాంకులు

సరూర్ నగర్‌లోని మహాత్మా జ్యోతిరావు ఫూలే (MJPT) BC వెల్ఫేర్ జూనియర్ కాలేజీ విద్యార్థులు NEET-2025 లో అత్యుత్తమ ప్రతిభ కనబరిచారు. పలువురు విద్యార్థులు 1753, 3543, 2564, 3617 వంటి రాష్ట్ర స్థాయి ర్యాంకులు సాధించారు. ఈ విద్యార్థులు చాలా మంది రైతులు, టైలర్స్, డ్రైవర్ల వంటి సామాన్య కుటుంబాల నుంచి వచ్చిన వారు. కేవలం ప్రభుత్వ గురుకులంలోని ఉచిత కోచింగ్‌తోనే ఈ విజయం సాధించారు.

ఈ కళాశాలలో ఇంటర్‌తో పాటు NEET, IIT-JEE, EAMCET లాంటి పోటీ పరీక్షలకు ఉచిత శిక్షణ ఇస్తున్నారు. విద్యార్థులకు డిజిటల్ క్లాస్‌రూమ్‌లు, గ్రంథాలయం, యోగా, ధ్యానం వంటి సౌకర్యాలు అందుబాటులో ఉన్నాయి. కాలేజ్ ప్రిన్సిపాల్ రష్మిత మాట్లాడుతూ, "ఇవి కేవలం ర్యాంకులు కాదు, ఇవి విద్యార్థుల జీవితాలు. వారి కష్టానికి ఫలితం" అని అన్నారు. విద్యార్థుల్లో ఒత్తిడి తగ్గించేందుకు రోజూ యోగా తరగతులు నిర్వహిస్తున్నామని పీటీ టీచర్ తెలిపారు.

విద్యార్థులు సుప్రియ (ర్యాంక్ 1753), కీర్తన (ర్యాంక్ 3543) తదితరులు తమ అనుభవాలను పంచుకున్నారు. "మాకు ఉచితంగా మెటీరియల్స్, లైబ్రరీ సౌకర్యం ఇచ్చారు. టీచర్లు చాలా సపోర్ట్ చేశారు" అని సుప్రియ చెప్పారు. తల్లిదండ్రులు లేని ఓ విద్యార్థి కూడా 7486 ర్యాంక్ సాధించి, ప్రభుత్వ విద్యపై నమ్మకం కలిగించాడు. ఈ విజయాలు కార్పొరేట్ కాలేజీలకు దీటైన ప్రత్యామ్నాయంగా నిలిచాయి.