మునికూడలి పుష్కర్ ఘాట్ పరిశీలించిన ఎమ్మెల్యే బత్తుల బలరామకృష్ణ

తూర్పు గోదావరి జిల్లా సీతానగరం మండలంలోని మునికూడలి పుష్కర్ ఘాట్‌ను రాజనగరం ఎమ్మెల్యే బత్తుల బలరామకృష్ణ నేడు పరిశీలించారు. ప్రస్తుతం 32 మీటర్ల పొడవున్న ఈ ఘాట్‌ను 54 మీటర్లకు విస్తరించాలని నిర్ణయం తీసుకున్నారు. అధికారులతో సమీక్ష నిర్వహించి మునికూడలిని మోడల్ ఘాట్‌గా తీర్చిదిద్దాలని లక్ష్యంగా నిర్దేశించారు.

2027 గోదావరి పుష్కరాల నేపథ్యంలో Deputy CM పవన్ కళ్యాణ్ రాజమండ్రిలో పర్యటించి అధికార యంత్రాంగాన్ని అప్రమత్తం చేశారు. CM చంద్రబాబు నాయుడు ఆరు జిల్లాల్లో పుష్కర ఘాట్ల అభివృద్ధిపై కార్యాచరణ ప్రకటించారు. గోదావరి పరివాహక ప్రాంతంలో కాలుష్య నివారణకు Pollution Control Board ద్వారా 100 కోట్ల రూపాయలు మంజూరు చేశారు.

54 మీటర్ల ఘాట్‌లో 9 మీటర్ల పిండప్రదాన ఘాట్‌ను వేరుగా నిర్మిస్తామని, మిగతా భాగం పుణ్యస్నానాలకు వినియోగపడేలా చేస్తామని బలరామకృష్ణ వెల్లడించారు. VIP రోడ్డు, ఎమర్జెన్సీ రోడ్డు, భక్తుల రోడ్డు అని మూడు విడిగా ఏర్పాటు చేసి రవాణా సౌలభ్యం కల్పిస్తామని తెలిపారు.

సీతానగరం మండలంలో గతంలో తొమ్మిది ఘాట్లు ఉండగా ఇప్పుడు 13 ఘాట్లు మంజూరు దశలో ఉన్నాయని, మరో మూడు కలిపి మొత్తం 16 ఘాట్లు నిర్మించేందుకు ప్రతిపాదన సమర్పించినట్లు ఎమ్మెల్యే తెలిపారు. 30 రోజుల్లో మునికూడలిని మోడల్ ఘాట్‌గా తయారు చేసేందుకు కార్యాచరణ సిద్ధం చేస్తామని హామీ ఇచ్చారు. యాత్రికులకు రహదారులు, టెంట్ సిటీలు వంటి సౌకర్యాలు కల్పిస్తామని ఆయన వివరించారు.