AGI రాకతో వైట్ కాలర్ ఉద్యోగాలపై తీవ్ర ప్రభావం – గూగుల్ మాజీ అధికారి హెచ్చరిక

గూగుల్ మాజీ అధికారి మో గవాడా మాట్లాడుతూ, రాబోయే కొన్నేళ్లలో ఆర్టిఫిషియల్ జనరల్ ఇంటెలిజెన్స్ (AGI) వైట్ కాలర్ ఉద్యోగాలను భారీగా ప్రభావితం చేస్తుందని హెచ్చరించారు. ప్రస్తుతం వాడుతున్న ChatGPT, Claude, Gemini వంటి AI సాధనాలు కేవలం ప్రాథమిక దశ మాత్రమేనని, నిజమైన మార్పు AGI తో వస్తుందని ఆయన అభిప్రాయపడ్డారు.

గవాడా ప్రకారం, కాల్ సెంటర్ ఏజెంట్లు, అడ్మినిస్ట్రేటివ్ అసిస్టెంట్లు, ట్రావెల్ ఏజెంట్ల వంటి ఎంట్రీ లెవెల్ నాలెడ్జ్ వర్కర్లపై తొలి ప్రభావం పడుతుంది. పారాలీగల్స్, ఫైనాన్షియల్ అనలిస్టులు, గ్రాఫిక్ డిజైనర్లు, కంపోజర్లు, మిడిల్ మేనేజర్ల పని భారం తగ్గుతుంది. వైద్య రంగంలో రోగ నిర్ధారణ చేసే డాక్టర్లపై కూడా ప్రభావం ఉంటుందని ఆయన అంచనా వేశారు.

వైట్ కాలర్ తర్వాత, రోబోటిక్స్ ద్వారా డ్రైవర్లు, లాజిస్టిక్స్, పోలీసింగ్ వంటి శారీరక శ్రమ ఉద్యోగాలపై AI ప్రభావం పడుతుందని గవాడా చెప్పారు. AI సాయంతో గతంలో 100 మంది చేసే పని ఇప్పుడు ఒక్కరే చేయగలరని, దీంతో కంపెనీలు కొత్త ఉద్యోగ నియామకాలు నిలిపివేస్తున్నాయని ఆయన వివరించారు.

ఈ పరిణామాల నుంచి తప్పించుకోవడానికి ప్రభుత్వాలు ముందస్తు ప్రణాళికలు రూపొందించాలని, లేదంటే సామాజిక అశాంతి, ఆర్థిక అస్థిరత తప్పదని గవాడా హెచ్చరించారు. యువత AI తో పోటీ పడకుండా, కమ్యూనికేషన్, క్రియేటివిటీ, క్రిటికల్ థింకింగ్ వంటి నైపుణ్యాలపై దృష్టి పెట్టాలని సూచించారు.

ఇదిలా ఉండగా, ఇటీవల వెలువడిన ఒక అంతర్జాతీయ నివేదిక ప్రకారం, రానున్న ఐదేళ్లలో ప్రస్తుత ఉద్యోగాల్లో 80 శాతం AI కారణంగా మాయమయ్యే ప్రమాదం ఉందని తెలుస్తోంది. రీటైల్, తయారీ, విద్యా రంగాలు ఎక్కువగా ప్రభావితమవుతాయని ఆ నివేదిక పేర్కొంది. ఈ నేపథ్యంలో, మారుతున్న సాంకేతిక పరిస్థితులకు అనుగుణంగా కెరీర్ ప్రణాళికలు రూపొందించుకోవడం అవసరమని నిపుణులు సూచిస్తున్నారు.